Isroil armiyasi va xavfsizlik kuchlari falastinlik bolalarga nisbatan munosabati uchun BMTning “qora ro‘yxati”ga kiritildi. Bu haqda Anadolu xabar berdi.
Mazkur qaror 2024-yilda falastinlik bolalarga qarshi sodir etilgan 7 188 ta huquqbuzarlik asosida qabul qilingan. Isroil bolalarga nisbatan og‘ir huquqbuzarliklar sodir etayotgan tomon sifatida qayd etilgan. Hisobotda yahudiy kuchlari “bolalarni o‘ldiruvchi va mayib qiluvchi”, shuningdek “maktab hamda/yoki shifoxonalarga hujum qiluvchi” tomon sifatida tilga olingan.
2024-yil bolalarga qarshi sodir etilgan og‘ir huquqbuzarliklar soni bo‘yicha rekord yil bo‘ldi. Jami 41 370 ta holat qayd etilgan. Hisobotda 22 495 nafar bola o‘ldirish, tan jarohati yetkazish, zo‘rlash va qurolli harakatlarga majburlash kabi jinoyatlardan jabr ko‘rgani ta’kidlangan. Bunday holatlar soni ketma-ket uchinchi yil ortib bormoqda.
Bolalarga nisbatan 2024-yilda eng ko‘p huquqbuzarliklar qayd etilgan hududlar qatoriga G‘azo sektori, Isroil va bosib olingan Falastin yerlaridan tashqari, Kongo Demokratik respublikasi, Somali, Nigeriya va Gaiti kiradi.
BMT hisobotida ta’kidlanishicha, 2023-yil davomida Isroil va bosib olingan Falastin hududlarida 2 959 nafar bolaga qarshi jami 8 554 ta og‘ir huquqbuzarlik sodir etilgan. Isroil kuchlari tomonidan 951 nafar falastinlik bola hibsga olingani qayd etilgan: 602 nafari G‘arbiy Sohilda, 259 nafari Sharqiy Quddusda, 90 nafari G‘azo sektorida. 11 nafar qiz bolaning taqdiri hozircha noma’lumligicha qolmoqda.
Isroil kuchlari tomonidan bolalarga nisbatan sodir etilayotgan jiddiy huquqbuzarliklar, ayniqsa qurbonlar va mayib bo‘lgan bolalar soni yuqoriligi, maktablar va shifoxonalarga uyushtirilgan hujumlar, shuningdek, bu muassasalarga tegishli himoyalangan shaxslarga nisbatan tajovuzlar hamda gumanitar yordamga to‘siqlar chuqur xavotir uyg‘otmoqda, deydi BMT bosh kotibi Antoniu Guterrish.
U Isroilni bu huquqbuzarliklar uchun javobgarlikka chaqirar ekan, tomonlardan xalqaro gumanitar huquq va bolalarni himoya qilishga oid normalarga amal qilishni so‘radi. U maktablar va shifoxonalar daxlsizligini saqlash, farqlash tamoyiliga rioya qilish, aholi yashaydigan hududlarda portlovchi qurollar va havo hujumlaridan foydalanmaslik zarurligini eslatdi.
Izoh (0)