Bojxona qo‘mitasi O‘zbekistonda ro‘yxatdan o‘tgan 59 ta avtomobil Tojikistonda noqonuniy sotib yuborilganini ma’lum qildi.
Qo‘mitaning Kontrabandaga qarshi kurashish boshqarmasi tomonidan Toshkent shahar, Toshkent va Namangan viloyatlari bojxona boshqarmalarining Kontrabandaga qarshi kurashish bo‘limlari tezkor xodimlari bilan hamkorlikda avtomobillarni noqonuniy sotib yuborish bilan shug‘ulanuvchi 8 nafar shaxs fosh etilgan.
Ular BYD, Volkswagen, Kaiyi X3, Honda, Geometry, Faw ID4 va boshqa rusumlardagi 59 ta avtotransport vositasining har birini 100-200 dollar evaziga Tojikistonga o‘tkazib bergan. Mazkur avtotransport vositalarining barchasi qo‘shni davlatda noqonuniy tarzda sotib yuborilgan.
Holat yuzasidan Bojxona qo‘mitasining Surishtiruv va ma’muriy amaliyot boshqarmasi tomonidan tergovga qadar tekshiruv harakatlari o‘tkazilib, Jinoyat kodeksining tegishli moddalari bilan jinoyat ishi qo‘zg‘atildi va tergov organiga topshirildi.
“Agar ishonchnoma asosida berilgan avtotransport vositasini qaytarib olishda muammolarga duch kelayotgan bo‘lsangiz yoki avtomashina O‘zbekistondan olib chiqib ketilgani yuzasidan shubha va gumonlaringiz bo‘lsa, zudlik bilan huquqni muhofaza qiluvchi idoralarga murojaat qilishingizni so‘raymiz”, deyiladi xabarda.
Bojxona qo‘mitasi shaxsiy avtotransport vositalarini boshqa shaxslarga ishonchnoma orqali berishda hushyor bo‘lishga chaqirdi.
Izoh (0)