Eron AQSHning Yaqin Sharqdagi harbiy bazalariga hujum uyushtirdi. Qatar poytaxti ustida amerikaliklar tomonidan kamida oltita raketa yo‘q qilindi. Bu haqda OAVlar xabar bermoqda.
Ma’lum qilinishicha, Eron yaqinda amerikaliklarning o‘z yadroviy infratuzilmasiga bergan zarbalariga javoban AQSHning harbiy bazalariga hujum qilgan. Shuningdek, yettinchi raketa Iroq tomon uchib o‘tgani ham aytilmoqda.
Tehron Qatardagi Amerika bazalaridan biriga zarba berganidan so‘ng, AQSHning har qanday tajovuzkor harakatini javobsiz qoldirmasligini ta’kidladi.
“Eron hech qachon o‘zining hududiy yaxlitligi, suvereniteti va milliy xavfsizligiga qilingan tajovuzni javobsiz qoldirmaydi”, dedi Eron harbiylari.
Axios manbalariga ko‘ra, Qatardagi AQSHning “Al-Udayd” bazasiga uyushtirilgan hujum “G‘alaba sharofati” deb nomlangan operatsiyaning boshlanishi bo‘lgan. Ayni paytda, Eron Iroqdagi Amerika obyektlariga qarshi “Abu Abdulloh” operatsiyasini amalga oshirishga kirishgan.
Voqeadan sal oldin AQSH razvedkasi Eronning AQSHning “Al-Udeyd” harbiy bazasiga hujum qilishi mumkinligi haqida ogohlantirgan edi. Fox News’ning ma’lum qilishicha, bu AQSHning Yaqin Sharqdagi eng yirik aviabazalaridan biri hisoblanadi.
Ta’kidlanishicha, Qatardagi amerikaliklar boshpanalarga yashirinishga chaqirilgan. Shuningdek, AQSH elchixonasi mamlakatdagi fuqarolariga zarbalar to‘xtagunicha keyingi xabargacha xavfsiz joylarda qolishni maslahat bergan. Shu orada Qatar hukumati mamlakat fuqarolari, rezidentlari va mehmonlari xavfsizligini ta’minlash maqsadida parvozlarga taqiq joriy etgan. Yaqin Sharqdagi voqealar rivoji munosabati bilan barcha ehtiyot choralari ko‘rilgan.
AQSH qurolli kuchlari markaziy qo‘mondonligining ilg‘or shtabi joylashgan “Al-Udeyd” aviabazasi so‘nggi kunlarda yuqori jangovar shaylik holatida edi. Obyekt yaxshi mustahkamlangan va Eron tomonidan bo‘lishi mumkin bo‘lgan hujumni kutib, zamonaviy havo hujumidan mudofaa tizimi bilan jihozlangan.
AQSH 22-iyunga o‘tar kechasi Erondagi uchta yadroviy obyektga zarba berdi. Soat 2:30 atrofida Amerikaning B-2 samolyotlari tog‘ ichida joylashgan Fordodagi uranni boyitish markaziga hujum qilib, unga kamida o‘nlab 13 tonnalik GBU-57 bunkerga qarshi bombalarini tashladi.
Bir vaqtning o‘zida suvosti kemalari Natanz va Isfahondagi obyektlarga 30 ga yaqin Tomahawk qanotli raketalarini uchirdi. Tramp nishonlar “to‘liq yo‘q qilinganini” e’lon qildi. Shu bilan birga, Oq uydagi yuqori martabali amaldorning The Wall Street Journal’ga ma’lum qilishicha, zarbalar Erondagi rejimni o‘zgartirishga qaratilmagan “bir martalik operatsiya” bo‘lgan.
Izoh (0)