“Isroilning Eronga har qanday javobi mintaqada keskinlikni kuchaytiradi”, dedi Qatar bosh vaziri Muhammad Abdulrahmon al-Tani Dohada AQSH davlat kotibi bilan o‘tkazilgan qo‘shma matbuot anjumanida.
“Isroilning Eronga har qanday javobi mintaqada keskinlashuvning kuchayishiga olib keladi. Biz mintaqada har qanday keskinlashuvning oldini olishni istaymiz va vaziyatni tinchlantirish uchun barcha tomonlar bilan gaplashmoqdamiz”, dedi u.
Uning so‘zlariga ko‘ra, “mintaqada tinchlik o‘rnatish, uning rivojlanishi va ravnaqi yo‘lida saʼy-harakatlarni jamlash” vaqti keldi.
Oktyabr oyi boshida Isroil armiyasi Janubiy Bayrutni o‘qqa tutgach, Eron Isroilga raketa hujumlarini uyushtirdi. Ma’lumotlarga ko‘ra, 200 ga yaqin ballistik raketalar Isroil tomoniga uchirilgan. Eron bu hujum “Hizbulloh” yetakchisi Hasan Nasrulloh va Islom inqilobi qo‘riqchilari korpusi qo‘mondonlarining o‘ldirilishiga javob ekanini ta’kidladi. Isroil mazkur hujumga javob zarbasi berishni va’da qildi. Ammo bu qachon amalga oshishi ma’lum qilinmadi.
Ammo 18-oktyabr kuni internetda “o‘ta maxfiy” deb belgilangan hujjatlar sizdirilgani ortidan Isroil Eronga hujumni keyinga qoldirgani xabar berildi. Hujjatlarda Isroil qo‘shinlarining harakati va yahudiy davlatining Eronga hujumga tayyorgarligi haqida ma’lumotlar bo‘lgan.
“Hujjatlarining oshkor etilishi ma’lum strategiya va tarkibiy qismlarni o‘zgartirish zarurati tufayli hujumni kechiktirdi. Qasos olinadi, ammo bu kutilganidan ko‘proq vaqt talab qiladi”, dedi Isroil razvedkasi vakili.
Izoh (0)