AQSH Eron o‘zining uran zaxiralarini Amerika zarbalaridan keyin qayerga ko‘chirganini bilmaydi. Bu haqda The New York Times xabar bermoqda.
“Eron yadro dasturining haqiqiy holati ancha noaniq bo‘lib chiqdi. Yuqori lavozimli AQSH amaldorlari Eronning qurolbop uranga yaqin zaxiralarining taqdiri haqida ma’lumotga ega emasliklarini tan olishdi”, deyiladi maqolada.
Ta’kidlanishicha, Isroil harbiylarining dastlabki tahlili Fordo uran boyitish zavodiga yetkazilgan zarar jiddiy ekanligini, biroq u butunlay vayron bo‘lmaganini ko‘rsatgan. Shu bilan birga, razvedka ma’lumotlaridan xabardor bo‘lgan ikki nafar isroillik amaldorning aytishicha, Eron so‘nggi kunlarda obyektdan uskunalar va uranni olib chiqib ketganiga doir dalillar ham mavjud.
Nashrning aniqlashtirishicha, AQSHning Eron yadro infratuzilmasiga bergan zarbalari uning rivojlanishini 2-5 yilga orqaga surishi mumkin.
Ma’lum qilinishicha, AQSH prezidenti Donald Trampning Eronga ehtimoliy zarbadan ikki hafta oldin bergan bayonoti eronliklarni g‘aflatda qoldirishga urinish bo‘lgan. Aslida bu bayonotga qadar Tramp allaqachon zarba tayyorlash haqida buyruq bergan, Bu haqda ma’muriyatdagi oz sonli kishilargina bilishgan.
22-iyunga o‘tar kechasi AQSH prezidenti Donald Tramp AQSH qurolli kuchlari Erondagi uchta yadroviy obyekt — Fordo, Natanz va Isfahonga muvaffaqiyatli hujum uyushtirganini ma’lum qildi. U Tehron mojaroni to‘xtatishga rozi bo‘lishi kerakligini ta’kidladi. 13-iyundan beri Isroil Eron yadro dasturiga qarshi operatsiya doirasida har kuni Eronga zarbalar bermoqda.
Izoh (0)