Germaniya Tashqi ishlar vazirligi fuqarolarini Eronni zudlik bilan tark etishga chaqirdi, Germaniyaning Tehrondagi elchixonasi esa ehtiyot choralarini ko‘rgani ma’lum qilindi.
Germaniyaning Lufthansa aviakompaniyasi “mavjud vaziyat tufayli” Tehronga barcha reyslarni bekor qilgan. Ushbu qaror kamida 18-aprelgacha amal qiladi. Bundan tashqari, Lufthansa Eron havo hududidan foydalanishdan voz kechgan.
“Biz hamkorlarimiz bilan birgalikda Yaqin va O‘rta Sharqdagi vaziyat keskinlashuvining oldini olish uchun diplomatik darajada barcha imkoniyatlarni ishga solyapmiz. Mintaqada yashovchi Germaniya fuqarolari, iltimos, xavfsizlik bo‘yicha ko‘rsatmalarimizga e’tibor bering”, — deyiladi Germaniya TIV xabarida.
Vazirlik fuqarolarini Eron, Isroil va G‘azoga bormaslikka chaqirgan. Bundan tashqari, Eron hududini zudlik bilan tark etish tavsiya etiladi. Ayni paytda Qatar, Birlashgan Arab Amirliklar, Bahrayn va Saudiya Arabistoni o‘z fuqarolarini zudlik bilan Isroil hududini tark etishga chaqirgan.
Avvalroq AQSH prezidenti Jo Bayden Eron hukumatini Isroilga qarshi javob zarbalaridan ogohlantirgandi. Shu bilan birga, u hujum muqarrar ekanini aytgan.
“Isroilni himoya qilishga sodiqmiz. Uni qo‘llab-quvvatlaymiz va himoya qilishga yordam beramiz. Eron esa muvaffaqiyatga erisha olmaydi”, — degan u.
O‘z navbatida, Eron agar amerikaliklar Isroil bilan ehtimoliy qurolli mojaroga aralashsa, AQSH harbiylari nishonga aylanishidan ogohlantirdi. Tegishli ogohlantirish bir qancha arab davlatlari orqali Jo Bayden administratsiyasiga yetkazilgan. Ogohlantirishda gap AQSH harbiylari Erondan Isroilga uchirilgan raketalarni urib tushirishi yoki Isroil tomonida amerikaliklar qarshi hujumda qatnashishi haqida ketyaptimi, aniq emas.
Eron va Isroil o‘rtasidagi urush ehtimoli
Keng ko‘lamli urush boshlanishi ehtimoli Isroil 1-aprel kuni Eronning Damashqdagi konsulligiga hujum qilganidan so‘ng boshlandi. Hujum oqibatida 11 kishi, jumladan, 2016-yilgacha Livan va Suriyadagi “Quds” elita kuchlariga rahbarlik qilgan Eron harbiy maslahatchisi general Muhammad Rizo Zohidiy, uning o‘rinbosari general Muhammad Hodi Hoji Rahimiy va yana besh eronlik zobit ham halok bo‘ldi. Shuningdek, uch nafar Suriya va bir nafar Livan fuqarosi vafot etdi.
Eronning BMT missiyasi zarbani terakt deb baholadi. Eron tashqi ishlar vaziri Husayn Amir Abdullohiyan mazkur hujum munosabati bilan Amerika javobgarlikka tortilishi kerakligini aytdi. Shundan keyin AQSH razvedkasi Isroilni Eronning javob zarbalaridan ogohlantirdi. Buning fonida Isroil bir qator davlatlardagi elchixonalarini vaqtinchalik yopdi va xodimlardan ishga kelmaslik so‘raldi.
AQSH Markaziy razvedka boshqarmasi Isroil rasmiylarini “yaqinda sodir bo‘ladigan ommaviy hujum” haqida ogohlantirgan. Amerika rasmiylarining ta’kidlashicha, Eron kamida uchta yadroviy bomba ishlab chiqarish uchun yetarli darajada boyitilgan uranga ega. Bu haqda rasmiy ma’lumot yo‘q, ammo Eronning ballistik raketalari Isroilga zarba bera oladi.
Izoh (0)