Eron raketasi Isroilning Beer-Sheva shahridagi Microsoft kompaniyasi ofisi binosiga zarba berdi. Eron harbiylarining ma’lumotiga ko‘ra, obyekt butunlay yo‘q qilingan, zarbadan so‘ng bino atrofida kuchli yong‘in yuz bergan. Bu haqda IRNA xabar bermoqda.
“Microsoft korporatsiyasi Beer-Shevaga otilgan atigi bitta raketa bilan yo‘q qilindi. Rejimga ko‘maklashishning oqibatlari bor!”, deya Islom inqilobi qo‘riqchilari korpusi (IIQK) vakili so‘zlarini keltirmoqda agentlik.
20-iyun tongida eronliklar Isroil tomon bir nechta ballistik raketa va kamikadze dronlarini yo‘lladi. Zarbalardan biri Beer-Shevaga tegib, Gav-Yam Negev texnomarkazi hududiga tushdi.
Isroil ommaviy axborot vositalari ma’lumotlariga ko‘ra, 18 kishi jarohat olgan, bir nechta bino shikastlangan. Texnopark hududida Isroil Mudofaa Kuchlari kiberboshqaruvi shtabi (IDF C4I) va razvedka markazi joylashgan bo‘lib, uning yonida Isroil qo‘shinlari Aloqa va axborot texnologiyalari korpusi filiali kampusi mavjud. Beer-Sheva Isroilning Nevatim harbiy aviabazasi joylashgan Negev sahrosi hududida joylashgan.
Isroil 20-iyunga o‘tar kechasi Tehronga bir qator zarbalar bergan. Hujumlar yadro tadqiqot majmuasi va o‘nlab harbiy obyektlarga qaratilgan. Zarbalarda 60 dan ortiq qiruvchi samolyot ishtirok etib, 120 ta o‘q-dori tashlagan. Isroil Mudofaa Kuchlari aniqlik kiritishicha, nishonlar orasida raketalar va raketa dvigatellari uchun xomashyo ishlab chiqarish obyektlari bo‘lgan. Bular Eron Mudofaa vazirligining sanoat asosini tashkil etgan. Shuningdek, SPND yadro loyihasi shtab-kvartirasiga ham zarbalar berilgan. Bu 2011-yilda tashkil etilgan ilg‘or texnologiyalar va qurol-yarog‘larni tadqiq qilish va ishlab chiqish markazidir.
Isroil 13-iyunga o‘tar kechasi Eronning yadro dasturiga qarshi “Isyonkor sher" operatsiyasini boshladi. Bir sutkadan kam vaqt o‘tgach, Islom Respublikasi javob hujumini amalga oshirdi. Keyingi kunlarda Isroil va Eron o‘zaro zarba berishni davom ettirdi. Ikkala tomon ham ushbu hujumlar natijasida halok bo‘lganlar va jabrlanganlar borligini ma’lum qildi, o‘z hududlaridagi bir qator obyektlarga zarba yetkazilganini tan oldi, ammo yetkazilgan zarar cheklangan ekanini ta’kidladi.
Izoh (0)