Kanadadagi o‘rmon yong‘inlaridan chiqayotgan tutun janubga siljib, AQSH fuqarolariga “yoz faslidan zavqlanishni qiyinlashtirmoqda”. Bu borada Qo‘shma Shtatlar Kongressining 6 nafar a’zosi Kanada elchixonasiga maktub yo‘lladi.
“Biz sizga yozdan zavq olishni qiyinlashtirayotgan Kanadadagi o‘rmon yong‘inlari haqida yozyapmiz”, deyilgan elchi Kirsten Hillmanga yuborilgan xatda.
Maktubni Tom Tiffani, Glenn Grotman, Mishel Fishbax, Bred Finstad, Pit Stauber va Tom Emmer kabi Kongress a’zolari imzolagan. Kanada elchixonasining ma’lum qilishicha, mamlakat o‘rmon yong‘inlarining oldini olishga “juda jiddiy qaramoqda”. Bu yilgi o‘rmon yong‘inlarida 2 nafar kanadalik halok bo‘lib, o‘n minglab odamlar evakuatsiya qilingan.
Tom Emmer Kongressning katta a’zosi sanaladi. U va uning 5 nafar respublikachi hamkasbi 7-iyul kuni e’lon qilingan maktubda shunday yozgan:
“Biz hukumatingiz o‘rmon yong‘inlari va janubga tarqalayotgan tutunni kamaytirish bo‘yicha qanday ish olib borayotganini bilishni istardik. Fuqarolarimizning ko‘chaga chiqish va xavfsiz nafas olish imkoniyatlari cheklangan. Chunki yong‘in tutuni havoning sifatini xavfli darajaga olib kelgan. Yoz oylari ochiq havoda dam olish, oila bilan vaqt o‘tkazish va yangi xotiralar yaratish uchun yilning eng yaxshi vaqtidir. Ammo yong‘in tutuni bularning barchasini yo‘qqa chiqarmoqda”.
Kanadaning Vashingtondagi elchixonasi matbuot kotibi Tarryn Elliott mamlakat hukumati “o‘rmon yong‘inlarining oldini olish, ularga javob berish va bartaraf etishga juda jiddiy yondashganini” ma’lum qilgan.
“Xat elchixonaga kelib tushganini va Kanadaning tegishli idoralariga yuborilganini tasdiqlashim mumkin”, dedi u.
Kanadada har yili yozda o‘rmon yong‘inlari sodir bo‘ladi. Ma’lumotlarga ko‘ra, 2023-yil mamlakat tarixidagi eng yomon yil bo‘lgan. O‘shanda yong‘inlar 8 kishining hayotiga zomin bo‘lgan va Angliyadan ham kattaroq hududni kul qilgan.
O‘rmon yong‘inlari markazi ma’lumotlariga ko‘ra, 2025-yilning shu davrigacha davlatda 2672 ta yong‘in sodir bo‘lgan. May va iyun oylarida Kanadaning g‘arbiy qismiga, ayniqsa, jiddiy zarar yetgan. Hududda rasmiylar favqulodda holat e’lon qilgan. Saskachevan va Manitoba provinsiyalarida 30 mingga yaqin odam evakuatsiya qilingan.
O‘rmon yong‘inlari tabiiy siklning bir qismi bo‘lib, Kanadaning o‘rmonlarini qayta tiklashda muhim rol o‘ynaydi. Yong‘inlarning aksariyatiga chaqmoq chaqishi sabab bo‘ladi. 2023-yilda Kanadadagi yong‘inlarning 93 foizi chaqmoqdan kelib chiqqan.
Izoh (0)