Rossiya 23-iyun kuni Ukraina poytaxti Kiyev shahriga hujum qildi. Hodisa oqibatida 3 kishi halok bo‘ldi, 13 kishi jarohatlandi. Bu haqda Favqulodda vaziyatlar bo‘yicha davlat xizmati (FVDX) xabar berdi.
Hujum oqibatida turar joylar, biznes markazi, maktab, metro bekati va boshqa inshootlar zarar ko‘rgan. Qurbonlar soni ortishi kutilmoqda. Jami 10 kishi, jumladan, 2 nafar bola va homilador ayol qutqarib qolingan.
Shaharga qilingan tungi hujum oqibatlarini bartaraf etish ishlari davom etmoqda, barcha xizmatlar faoliyat yuritmoqda. Ma’lumotlar aniqlanmoqda, deya xabar bergan idora.
Ukraina ichki ishlar vaziri Igor Klimenko esa halok bo‘lganlar soni oshganini ma’lum qilgan.
Eng og‘ir talafotlar Shevchenkovskiy tumanida kuzatildi. Ko‘p qavatli turar joy binosining butun podyezdi vayron bo‘lgan. Hozirgi paytda 4 kishi halok bo‘lgan. FVDX xodimlari 10 nafar yaradorni qutqarib olgan. Barchaga tibbiy va psixologik yordam ko‘rsatilmoqda. Vayronalarni tozalash ishlari davom etmoqda. Bizning ma’lumotlarimizga ko‘ra, vayronalar ostida hali ham odamlar bor, degan u.
Kiyev harbiy ma’muriyati rahbari Timur Tkachenko shahardagi vayronagarchiliklar ko‘lami haqida ma’lumot bergan. Unga ko‘ra, Solomenskiy tumanida dron qoldiqlari tushishi oqibatida noturar binoning tomi yonib ketgan, 5 ta joyda hujum tufayli zarar qayd etilgan. Svyatoshinskiy tumanidagi stadion zarar ko‘rgan, turar joy binosi yonida yong‘in chiqqan va noturar joy binosiga zarar yetgan.
Hujum paytida “Svyatoshin” metro bekatining chiqish joylaridan biri va unga tutash hudud — bekat shikastlangan. Bu yerda ikki kishi jarohat olgan. Ular kasalxonaga yotqizilmasdan, joyida yordam ko‘rsatilgan, dedi Tkachenko.
Darnitskiy tumanida ikki qavatli turar joy binosi shikastlangan. U yerda jabrlanganlar va yong‘in qayd etilmagan.
Izoh (0)