Xorazmda FVV tizimining 2 nafar xodimining noqonuniy harakatlariga chek qo‘yilgani ma’lum qilindi.
Keltirilishicha, Tuproqqal’a tumani Favqulodda vaziyatlar bo‘limi xodimi Xazorasp tumanida yashovchi fuqaroning ishonchiga kirib, mansabdor tanishlari orqali uni Xorazm viloyati favqulodda vaziyatlar boshqarmasiga ishga kiritib qo‘yish evaziga 1500 AQSH dollari talab qiladi.
DXXning Xorazm viloyati bo‘yicha boshqarmasi hamda Iqtisodiy jinoyatlarga qarshi kurashish departamenti hamkorligida o‘tkazilgan tezkor tadbirda u oldindan 400 AQSH dollari va 1 mln 300 ming so‘m olgan vaqtida ashyoviy dalillar bilan ushlandi.
Shovot tumani Favqulodda vaziyatlar bo‘limi xodimi ham o‘zganing ishonchiga kirib, ichki ishlar organlaridagi tanishlari orqali unga haydovchilik guvohnomasi olib berishini aytib, evaziga 1400 AQSH dollari va 1 mln 300 ming so‘m olganlik holati hujjatlashtirildi.
Hozirda mazkur favqulodda vaziyatlar qutqaruvchilariga nisbatan Jinoyat kodeksining 168, 211-moddalari bilan jinoyat ishlari qo‘zg‘atilib, tergov harakatlari olib borilmoqda.
Toshkent shahar FVB boshlig‘i o‘rinbosari pora olishda gumonlanib qamoqqa olingan edi.
Uning noqonuniy harakatlari korrupsiyaga qarshi kurashish doirasida Davlat xavfsizlik xizmati organlari tomonidan olib borilgan tezkor-qidiruv tadbirlari davomida fosh etilgan.
Jumladan, mazkur mansabdor shaxs o‘z xizmat mavqeyini suiiste’mol qilib, Toshkent shahrida qurilishi rejalashtirilgan binolarning eskiz loyihasini tasdiqlash, yong‘indan avtomatik tarzda xabar beruvchi qurilmalar bo‘yicha tuzilgan dalolatnomalarni imzolash hamda yangi qurilgan yoki rekonstruksiya qilingan binolarni Davlat qabul komissiyasiga foydalanishga topshirilishida ijobiy xulosa berish evaziga doimiy ravishda tamagirlik yo‘li bilan pora olib kelgan.
2025-yilning yanvarida Namangan viloyati Pop tumani favqulodda vaziyatlar bo‘limi boshlig‘i 160 ming dollar olayotganida qo‘lga tushgandi. Sirdaryo viloyati Sayxunobod tumani Favqulodda vaziyatlar bo‘limining tezkor bo‘linmasi boshlig‘i ham noqonuniy ravishda 7 ming dollar olayotganida ushlangandi.
Fevral oyining oxirlari va mart oyi boshlarida FVV rahbari va uning ikki o‘rinbosari ishdan olinib, yangilari tayinlangandi. Shavkat Mirziyoyev qurilishga ruxsat berish, binoni topshirishda yong‘in xavfsizligi bo‘yicha byurokratiya va qonun buzilish ko‘payib ketgani uchun favqulodda vaziyatlar vaziri va uning o‘rinbosarlari ishdan olinganini aytgandi.
Izoh (0)