Ijtimoiy tarmoqlarda Samarqand shahridagi 32-umumtaʼlim maktabi o‘qituvchilari hayot uchun xavfli tepaliklarda taʼmirlash ishlarini amalga oshirayotgani to‘g‘risida xabarlar tarqaldi. Ushbu holatga viloyat Maktabgacha va maktab taʼlimi boshqarmasi rasmiy munosabat bildirdi.
Maʼlum bo‘lishicha, tasvirlardagi vaziyat Samarqand shahridagi 32-umumtaʼlim maktabi emas, shahardagi 24-umumtaʼlim maktabida yuz bergan.
Viloyat taʼlim boshqarmasi majburiy mehnatga jalb etish bilan bog‘liq har qanday holatlarni qoralashini bildirib, barchasi to‘liq nazoratga olinganini, o‘rganish ishlaridan so‘ng qo‘shimcha maʼlumot berilishini maʼlum qilgan.
Avvalroq ham shu kabi holat Andijon viloyati Marhamat tumanidagi 42-maktabda kuzatilgani, unda matematika, ingliz tili, rus tili, mehnat va boshqa fanlardan dars beruvchi o‘qituvchilar mehnat taʼtilida bo‘lganiga qaramay, maktabda “hashar”ga chaqirilgani to‘g‘risida xabar qilingan. Ushbu maktab direktori xizmat vazifalarini lozim darajada bajarilmaganligi uchun egallab turgan lavozimidan ozod etilgan.
Izoh (0)