Isroil mudofaa vaziri Isroil Kats G‘azo sektorining janubiy qismidagi Rafah xarobalari o‘rnida 60 kun ichida 600 ming falastinlikni joylashtirish uchun “insonparvarlik shahri” barpo etishni buyurdi. Bu haqda Der Spiegel jurnali xabar bermoqda.
Katsning aytishicha, loyihaning maqsadi ketma-ket ikkinchi yil insoniy falokatga yuz tutayotgan tinch aholiga HAMAS radikal harakatining ta’sirini kamaytirish. Uning rejasiga ko‘ra, lager boshqaruvi nomi aytilmagan “xalqaro hamkorlar”ga topshirilishi kerak. Shu bilan birga, Isroil harbiy kuchlari perimetr bo‘ylab xavfsizlikni nazorat qilishda davom etadi.
Lagerga kiradigan har bir shaxs HAMAS jangarilarining yo‘qligini ta’minlash uchun “ishonchlilik” tekshiruvidan o‘tkaziladi.
“Muhim jihati shundaki, lagerdagilar uni tark eta olmaydilar”, deb ta’kidladi vazir.
Isroillik inson huquqlari himoyachisi Maykl Sfard The Guardian nashrida bergan intervyusida loyihani “insoniyatga qarshi jinoyat” deb baholagan.
G‘azo sektorida hozirda 2 milliondan ortiq kishi yashaydi. Ularning aksariyati 2023-yil 7-oktyabrda Isroil hududiga qilingan hujumdan so‘ng boshlangan Isroilning HAMASga qarshi davom etayotgan urushi oqibatida uy-joylaridan ayrilgan.
18-may kuni Isroil armiyasi “Gideon aravalari” nomli keng ko‘lamli quruqlik operatsiyasi doirasida anklavning shimoliy va janubiy hududlarida jangovar harakatlar boshlanganini e’lon qildi. Unda beshta diviziya ishtirok etmoqda.
May oyi boshida Isroil G‘azo sektori aholisini mintaqa tashqarisiga chiqarish maqsadida “Gideon aravalari” maxsus operatsiya o‘tkazishi ma`lum qilingandi. Operatsiya doirasida anklav janubida yagona gumanitar hudud tashkil etilishi rejalashtirilgan bo‘lib, u yerda 2 millionga yaqin tinch aholi joylashtirilishi ko‘zda tutilgan.
Izoh (0)