Fransiya prezidenti Emmanuel Makron Buyuk Britaniya bosh vaziri Kir Starmerdan Falastinni davlat sifatida tezroq tan olishga erishishni xohlamoqda. Bu haqda Telegraph gazetasi Buyuk Britaniya hukumatidagi manbaga asoslanib xabar berdi.
Fransuzlar bizni Falastinni tan olish masalasiga qaytarishga urinmoqda. Biz bunga ko‘nmaymiz. Bu ish “biz buni qildik” deyish uchungina emas, balki shu orqali biror narsaga erisha olishga ishonch komil bo‘linganda qilinadi, dedi nashr suhbatdoshi.
Ta’kidlanishicha, Falastin masalasi Makronning Starmer bilan uchrashuvida, Fransiya rahbarining 8—10-iyul kunlari Buyuk Britaniyaga uch kunlik tashrifi davomida muhokama qilinadi.
Gazeta ma’lumotiga ko‘ra, hozircha tomonlar o‘rtasida Falastinni tan olish muddati masalasida kelishmovchiliklar saqlanib qolmoqda. Nashr yozishicha, Makron Falastin davlatchiligini tezroq tan olish tarafdori.
Biz Falastin-Isroil mojarosini isroilliklar va falastinliklarga xavfsizlik va barqarorlikni kafolatlaydigan ikki davlat yonma-yon yashashi tamoyili asosida hal etilishini qo‘llab-quvvatlaymiz. Bizning uzoq yillik nuqtayi nazarimiz shundan iboratki, biz Falastin davlatini tinchlik jarayoni uchun eng qulay vaqtda tan olamiz, dedi Buyuk Britaniya Tashqi ishlar vazirligi vakili.
Telegraph xabariga ko‘ra, Londonda Falastinni tan olish “shunchaki ramziy” qadam bo‘lmasligini istashmoqda. Shu bois, Britaniya tomonining fikricha, bu masalani Falastinning HAMAS radikal harakatining javob choralariga bog‘lash kerak. Xususan, qirollik hukumati HAMASdan qurollarni topshirishni va Isroil harbiy harakatlaridan keyin Falastinni tiklash paytida unga rahbarlik qilmaslikka rozi bo‘lishni talab qilishi mumkin.
Izoh (0)