Bugungi kunda turk seriallari olamida har xil janrlarda suratga olingan juda ko‘plab loyihalar mavjud. Biroq ularning barchasi ham tomoshabinni faqat o‘ziga jalb eta olish bilan cheklanmay, e’tiborini butun davomiyligi mobaynida saqlab qola olmaydi. Ammo ayrim seriallar bor-ki, ularning har bir epizodi muxlislar tomonidan sabrsizlik bilan kutilgan, syujet esa tomoshabinni ekrandan uzoqlashtirmagan. Ushbu maqolada oxirigacha tomoshabinlar e’tiborini yo‘qotmagan turk seriallari haqida so‘z boradi.
“Adolat”(2021)
“Kinopoisk”da reytingi 8.8 ball
Prokuror Ilg‘oz Kaya hamda advokat Jaylin Erguvanning hikoyasi oddiy turk seriallaridan biri bo‘lib qolishi mumkin edi. Ilg‘oz kichik ukasining aybsizligiga ishonib, uni qamoqdan qutqarish uchun aynan Jaylin uni himoya qilishini so‘raydi. Ammo birgalikda ishlash jarayoni kutilmagan natijalarga olib keladi va ko‘plab insonlarning hayotini tubdan o‘zgartiradi. Ajoyib ssenariy mualliflari, aktyorlarning mahoratli o‘yinlari va butun suratga olish jamoasining mehnati tufayli bu serial turk seriallari orasida haqiqiy hitga aylangan. Bu yerda sevgi va nafrat, xiyonat va do‘stlik, intriga va cheksiz, mutlaqo kutilmagan syujet burilishlari mavjud. Serialning eng muhim xususiyati shundaki, har bir keyingi mavsumda voqealar yanada dinamik tus oladi. Kinolenta prodyuserlari esa asosiy ishni uddaladi — voqealarni mantiqan va o‘z vaqtida yakunlab, serialni to‘rtinchi mavsumga cho‘zish bilan buzishmadi.
Asosiy rollarda: Pinar Deniz, Kaan Urganjio‘g‘lu, Ugur Aslan va boshqalar.
“Chuqur” (2016)
“Kinopoisk”da reytingi 86 ball
“Chuqurda shoh bo‘lish mumkin emas, faqat ota bo‘lish mumkin” — bu so‘zlar Idris ota tomonidan aytilgan bo‘lib, serialning har bir muxlisi uchun tanishdir. Chuqur — Istanbulning tumanlaridan biri bo‘lib, u yerda hamma narsani Kochovali oilasi boshqaradi. Bu oddiy mafiya klani emas, balki katta oila hisoblanadi. Bu yerda yagona qoida bor — man etilgan moddalarning savdosi qat’iyan taqiqlanadi. Ammo bir kuni yangi guruh paydo bo‘ladi, u esa ushbu taqiqni buzmoqchi va Chuqur tumanini o‘z nazoratiga olishni xohlaydi. Shu vaqt ichida Idrisning kichik o‘g‘li Yamach, qiz do‘sti bilan uyga qaytadi. Albatta, ular endi osoyishta va baxtli hayotni unutishi kerak bo‘ladi. Bu qiziqarli turk serialining yagona kamchiligi shundaki, undan keyin shunday darajada tomoshabinni o‘ziga jalb etadigan yangi serial topish qiyin. Har bir yangi epizod muxlislar tomonidan katta intizorlik bilan kutib olindi va bu aslo ajablanarli emas.
Asosiy rollarda: Aras Bulut Iynemli, Erkan Kolchak Ko‘stendil, Riza Kochao‘g‘lu va boshqalar.
“Ertug‘rul” (2014)
“Kinopoisk”dagi reytingi: 8,5
Bu tarixiy serial turk seriallari muxlislari uchun juda yaxshi tanish. Aynan ushbu serial o‘z vaqtida dunyoning turli mamlakatlarida katta mashhurlikka erishib, Ginnes rekordlar kitobiga ham eng yaxshi drama asari sifatida kiritilgan. Ko‘p qismli kinokartinada Usmoniylar imperiyasining asoschisi va Usmon G‘ozining otasi buyuk Ertug‘rulning hayoti hikoya qilinadi. Dinamik syujet, yuqori mahoratdagi aktyorlik va tarixiy faktlar bilan badiiy tasavvurning uyg‘unligi “Ertug‘rul”ni eng ta’sirli turk tarixiy seriallari qatoriga olib chiqdi.
Asosiy rollarda: Engin Altan, Hyulya Darjan, Jengiz Joskun va boshqalar.
“Quyoshni kutib” (2013)
“Kinopoisk”dagi reytingi: 8,4
Mazkur serial 2013-yilda taqdim etilgan bo‘lib, Kerem Byursinning butun dunyo bo‘ylab tanilishiga sabab bo‘lgan asar hisoblanadi. Melodrama qisqa vaqt ichida reytinglar cho‘qqisiga chiqdi, bunga esa sifatli syujet va aktyorlarning zo‘r o‘yinlari sabab bo‘ldi. Serialning syujeti dastlab oddiydek ko‘rinadi. Yigit va qizning birinchi uchrashuvi yoqimli bo‘lmagan bo‘lsa-da, chin dildan sevish uchun bu hech qanday to‘siq emas. Serial faqat sevgi haqida emas, balki maktabdagi zo‘ravonlik, oila muammolari va kollej talabalari orasidagi yolg‘izlik kabi mavzularni ham yoritadi. Barcha mavzular oqilona hamda muvofiq tarzda bog‘langan bo‘lib, buning uchun syujet mualliflariga alohida minnatdorlik bildirish kerak. Hali ham Kerem Byursin muxlislari ushbu serialni uning eng yaxshi ishlari deb hisoblashadi va ko‘pincha qayta ko‘rishadi.
Asosiy rollarda: Kerem Byursin, Xande Doandemir, Emre Kinay va boshqalar.
“Taqiqlangan sevgi” (2008)
“Kinopoisk” reytingi: 8,3
Bihter va Behlulning ta’qiqlangan va fojiali sevgi hikoyasi har bir tomoshabinga o‘z sabog‘ini berdi. Kimdir Bihterni ayblasa, boshqalar Behlulning zaifligi va shubhalarini sabab qilib ko‘rsatishadi. Romanning ekranlashtirilgan versiyasi katta muvaffaqiyat qozondi hamda hozirgacha turk televideniyasida muvaffaqiyatli efirga uzatilmoqda.
Asosiy rollarda: Beren Saat, Kivanch Tatlitug‘ Selchuk Yontem va boshqalar.
“Ijaraga olingan sevgi” (2015)
“Kinopoisk” reytingi: 8,3
Turkiyaning eng mashhur va yuqori reytingga ega romantik komediyalaridan biri hozirgacha o‘z dolzarbligini yo‘qotmagan. Barish va Elchin tandemiga tomoshabinlar va tanqidchilar tomonidan katta maqtovlar yog‘dirilgan. Oson hmada sodda ko‘ringan syujet millionlab tomoshabinlarni o‘ziga jalb qildi va ularni ekrandan uzmay qoldi. Omer va Defnening hikoyasi kimlar uchun romantik, kimlar uchun kulgili, ba’zilar uchun esa Zulayho haqidagi ertakdek bo‘lib, har bir qahramon hayotdan muhim saboq oldi. Har holda, bugungi kunda ham turk seriallari muxlislari ushbu hitni yaxshi ko‘rib, qayta-qayta tomosha qiladi.
Asosiy rollarda: Elchin Sangu, Barish Arduch, Salih Bademchi va boshqalar.
“Sevgi iztirobi” (2015)
“Kinopoisk” reytingi: 8,2
Emmi mukofoti bilan taqdirlangan madaniy turk drama seriali alohida tanishtirishni talab qilmaydi. Amir, Nihon va Kamol orasidagi sevgi uchburchagi barcha turk seriallari muxlislari uchun juda mashhur. Tomoshabinlar yangi epizodlarni katta intizorlik bilan kutib, bu hikoyaning baxtli yakuni bo‘lishini orzu qilishgan, ammo bu ro‘y bermagan. Go‘zal, ammo qayg‘uli sevgi hikoyasi, qiziqarli syujet, chiroyli musiqalar va suratga olish joylari — bularning barchasi “Sevgi iztirobi” serialidadir. Lekin serialning eng katta yutug‘i — bosh va yordamchi rollardagi aktyorlarning ajoyib o‘yinlari hisoblanadi.
Asosiy rollarda: Neslihan Atagul, Kaan Urganchio‘g‘lu, Burak O‘zchivit va boshqalar.
Izoh (0)