Fransiyaning Nanter shahri prokuraturasi Marokash terma jamoasi va Parijning “PSJ” klubi himoyachisi Ashraf Hakimiga nisbatan 2023-yilda ko‘tarilgan zo‘rlash ishi bo‘yicha rasmiy ayblov qo‘yilishini so‘rab, sudga murojaat qildi. Bu haqda Le Parisien nashri xabar berdi.
Manbaga ko‘ra, endilikda ish tergov tomonidan ko‘rib chiqiladi va aynan ular Hakimiga qarshi ayblov xulosasining asosli yoki asossiz ekanini aniqlaydi. Agar ayblovlar isbotlansa, marokashlik futbolchiga 15 yilgacha ozodlikdan mahrum etish jazosi tayinlanishi mumkin.
Hakimi ushbu jinoyat ishi doirasida 2023-yilda ayblangan edi. Unga ko‘ra, 24 yoshli ayol Instagram tarmog‘i orqali futbolchi bilan tanishganini aytib bergan. Oradan bir oy vaqt o‘tib, u jinsiy tajovuzga uchragani yuzasidan politisyaga ariza yozadi. Ammo futbolchi bu ayblovlarni qat’iyan rad etgan. Shundan beri bu holat futbol olamida shov-shuvlarga sabab bo‘lib kelmoqda.
Ma’lumot uchun, futbolchi o‘tgan mavsum “PSJ” safida jami 55 o‘yinda maydonga tushib, 11 ta gol va 16 ta golli uzatma muallifi bo‘lgan. Marokashlik himoyachining Parij klubi bilan amaldagi shartnomasi 2029-yilning yoziga qadar tuzilgan. Transfermarkt portaliga ko‘ra, Ashraf Hakimining transfer qiymati 80 million yevroga teng.
Izoh (0)