Isroilning G‘azo sektoriga so‘nggi 24 soatda amalga oshirgan hujumlari oqibatida kamida 39 nafar falastinlik halok bo‘lgan. Bu haqda Al Jazeera nashri xabar berdi.
Manbada aytilishicha, eng faol hujumlar Jabaliya aholi puktida amalga oshirilgan. Isroil havo kuchlari shaharchaning turli qismlarini o‘qqa tutgan.
Rasmiylar o‘nlab fuqarolar vayron bo‘lgan binolar ostida qolib ketganini bildirgan. Hududda qutqaruv guruhlari bo‘lmagani bois oddiy aholi vakillari bino ostida qolganlarni qutqarish uchun ko‘ngillilardan iborat guruhlar tashkil etgan.
G‘azo shimolidagi Jabaliya hududida eng yirik muhojirlar lagerlaridan biri joylashgani xabar qilingan. Lager BMT tomonidan 1948-yilda tashkil qilingan.
Jabaliyadagi lager 1948-yilda Falastin hududida yuz bergan etnik qirg‘in oqibatida qochqinga aylangan tinch aholi vakillariga boshpana berish uchun tashkil qilingan. U hozirda ham G‘azo sektoridagi eng yirik lagerlar qatorida bo‘lib, lager hududida kamida 26 ta maktab joylashgan.
Al Jazeera nashri Isroil kuchlari Xon Yunis shahriga ham zarba berganini yozgan. Ushbu shahar G‘azo sektori janubida bo‘lib, so‘nggi 3 oy davomida Tel-Aviv askarlarining nishoniga aylangan edi.
Xon Yunisdagi turar joy binolariga hujum oqibatida kamida 5 kishi halok bo‘lgani aytilgan. Falastinning WAFA nashri ham bu maʼlumotni tasdiqlagan.
Avvalroq Isroil hujumlari natijasida Rafahdan qochayotgan tinch aholi vakillari shimoli-sharqdagi Xon Yunis shahri tomonga boshpana izlab ketayotgani xabar qilingan edi.
Izoh (0)