Joan Rouling tomonidan yozilgan “Omon qolgan bola” haqidagi ertak yozuvchini bir kechada superyulduzga aylantirdi. Uning asosida suratga olingan filmlar esa butun dunyo bo‘ylab millionlab tomoshabinlar tomonidan ko‘rilgan. Ushbu maqolada Roulingning 60 yoshga va Garri Potterning 45 yoshga to‘lgani munosabati bilan, film tugaganidan so‘ng (2011-yildan keyin) yosh aktyorlar mashhurlik bilan qanday kurashgani va hayotda o‘z o‘rnini qanday topgani haqida so‘z boradi. Daniel Redkliff Garri Potter rolini ijro etgan Daniel Redkliff ko‘plab hamkasblari kabi suratga olish maydonchasida ulg‘aydi. U kino sanoatiga 2001-yilda, “Hikmatlar toshi” filmi orqali kirib kelgan edi. Ammo 2011-yilda Potter filmlarining suratga olinishi yakunlangach, u yosh sehrgar obrazidan uzoqlashishga qat’iy kirishdi va o‘z aktyorlik faoliyatini noodatiy rollar bilan boyitdi. Shuning uchun Redkliffni “Qora libosli ayol” mistik trillerida, “Akimbo qurollari” komedik jangovar filmida hamda mashhur “Mo‘jizakorlar” serialida ko‘rish mumkin. 2012-yilda u Mixail Bulgakovning hikoyalar to‘plamiga asoslangan “Yosh shifokorning qaydnomalari” mini-serialida bosh rolni ijro etdi. Qiziq tomoni shundaki, Daniel Redkliff rus yozuvchisi Bulgakovni o‘zining eng sevimli muallifi deb bir necha bor ta’kidlagan. Shuningdek, u teatr sahnasida ham o‘zini sinab ko‘rdi va “Ekvus” hamda “Biznesda hech narsa qilmasdan qanday muvaffaqiyatga erishish mumkin” kabi spektakllardagi ishtiroki bilan tanqidchilar va tomoshabinlarni hayratda qoldirdi. Kameralar ortida esa Redkliff oson hayot kechirmadi — u o‘smirlik chog‘idayoq alkogolizm bilan kurashishga majbur bo‘lgan. Biroq u bu og‘ir sinovlarni yengib o‘ta oldi va baxtli oilaviy hayot quroldi. 2020-yilda Daniel aktrisa Erin Darkga uylangan — ular “Sevganlaringni o‘ldir” filmi suratga olinayotganda tanishgan. 2023-yilda esa juftlikning o‘g‘li — Aaron dunyoga keldi. Rupert Grint Garri Potterning sodiq va mehribon do‘sti Ron Uizli roli Rupert Grintga dunyo miqyosida shuhrat keltirdi. Ammo Potter filmlaridan so‘ng aktyor faoliyatida tanaffus olishga va omma e’tiboridan chetda bo‘lishga qaror qildi. Katta miqdordagi gonorar evaziga u bolalikdagi orzusini amalga oshirdi — muzqaymoq furgoni sotib olib, ko‘chalarda yurib, bolalarni bepul muzqaymoq bilan siyladi. Oradan ko‘p o‘tmay, Grint yana kinoga qaytdi va mustaqil filmlarda o‘zini sinab ko‘rdi: 2013-yilda u “Xavfli illyuziya” nomli festival dramasi, 2015-yilda esa “Oy firibgarligi” komediyasida rol o‘ynadi. So‘nggi yillarda u televizion loyihalarda ham faol ishtirok etmoqda: masalan, M. Nayt Shyamalanning “Xizmatkorlar uyi” qo‘rqinchli seriali va Gilyermo del Toroning “Noyob buyumlar kabineti” antologiyasida. Grint yulduzlikdan yiroq, oddiy hayot kechiradi. Uning aytishicha, u kasbiy faoliyat bilan oilaviy hayot o‘rtasida muvozanat topishga intiladi. 2018-yilda Rupert uzoq yillik sevgan qizi — aktrisa Jorjiya Grumga uylangan. Ikki yil o‘tib, juftlikning qizi tug‘ildi. Unga noodatiy ism qo‘yildi — Uensdey.
×![Lightbox Image]()
Izoh (0)