G‘azo sektorida gepatit A bilan kasallanganlar soni qariyb 40 mingga yetdi. Falastin-Isroil mojarosi avj olishidan avval bu yerda atigi 85 nafar odamda infeksiya holati qayd etilgandi.
Bu haqda BMTning Yaqin Sharqdagi falastinlik qochqinlarga yordam ko‘rsatish agentligi (UNRWA) ma’lum qildi.
Unga ko‘ra, anklavda har hafta 800 dan 1 minggacha yangi kasallik holati qayd etilgan. Xususan, UNRWA tomonidan G‘azo fuqarolari uchun tashkil qilingan boshpanalarda gepatit A tarqalishi davom etmoqda. Agentlikning qayd etishicha, gepatit tarqalishiga boshpanalarda joy yo‘qligi, toza suv va gigiyena vositalarining yetishmasligi sabab bo‘lgan.
“Oilalar o‘z uylarini tashlab, gavjum lager va boshpanalarda yashashga majbur. Ularda toza suv, gigiyena vositalari yetishmaydi va chiqindilar to‘g‘ri yo‘q qilinmayapti. Bu inqiroz UNRWAning kasallarga yordam berish bo‘yicha sog‘liqni saqlash dasturi ishiga sezilarli darajada to‘sqinlik qilishda davom etmoqda”, dedi sektorning dastur menejeri G‘aza Ghada Al-Jadba.
Izoh (0)