O‘zbekistonda may oyida eng ko‘p odamni ish bilan taʼminlagan korxonalar top o‘ntaligi eʼlon qilindi

O‘zbekistonda may oyida aholini daromadli mehnat bilan band qilgan top-10 ish beruvchilar maʼlum qilindi.

Kambag‘allikni qisqartirish va bandlik vazirligi tomonidan taqdim etilgan maʼlumotga ko‘ra, 2025-yilning may oyida aholini daromadli mehnat bilan band qilgan top-10 ish beruvchilar quyidagicha:

• “Real Kapital Kamfort” MCHJ (Qashqadaryo viloyati) — 780 nafar
• “Discover Invest” MCHJ (Toshkent shahri) — 488 nafar
• “Anglesey Food” MCHJ XK (Toshkent shahri) — 455 nafar
• “Navoiy kon-metallurgiya kombinati” AJ (Navoiy viloyati) — 399 nafar
• “Talimarjan Shared Facilitiyes” MCHJ (Qashqadaryo viloyati) — 398 nafar
• “Uzum Market” MCHJ XK (Toshkent shahri) — 390 nafar
• XK “Vang‘ozi Trans Servis” (Navoiy viloyati) — 372 nafar
• “Jafarbek Quruvchi” MCHJ (Samarqand viloyati) — 323 nafar
• “Talimarjan Operations and Maintenance” MCHJ XK (Qashqadaryo viloyati) — 295 nafar
• “Artel Electronics” MCHJ XK (Toshkent shahri) — 267 nafar.

2025-yilda 5 mln 200 ming nafar kishini daromadli mehnat bilan ta’minlash, 1 mln 400 ming kishini esa doimiy ishga joylashtirish belgilangan. 

Nimaning hisobiga bunday ko‘rsatkichlarga erishmoqchimiz?

Sayidjon Rajabov, O‘zbekiston Respublikasi Kambag‘allikni qisqartirish va bandlik vazirligi bosh mutaхаssisi:

Buning ichida doimiy ish o‘rni asosida mavsumiy ishlar bor. Shuningdek, birinchi yo‘nalish — investitsiya loyihalarini ishga tushirish orqali 290 ming fuqaroni doimiy ish o‘rinlariga band qilish belgilanyapti. Ikkinchi yo‘nalish — mahallalarda tijoriy bank xodimi lavozimini joriy etish. 3,6 foiz aholini ishga joylashtirish, tadbirkorlikka jalb qilish masalalar Markaziy bankka yuklatilyapti.

Uchinchi yo‘nalish — qishloq xo‘jaligi yo‘nalishi bo‘lib, 1 yilda 1 mln 200 ming aholini ham doimiy, ham mavsumiy ishlarga jalb qilish reja qilingan. To‘rtinchi yo‘nalish bu — qurilish. U orqali 168 ming odamni ham doimiy, ham vaqtinchalik ishlarda bandligini ta’minlash belgilangan. Mana shu 5,2 million aholi bandligini ta’minlash bo‘yicha amalga oshiriladigan ishlar tahlili va uni monitoring qilib borish Kambag‘allikni qisqartirish va bandlik vazirligiga yuklatilgan. Bu raqamlarni onlayn monitoring qilib borish maqsadida yangi www.mehnat.uz platformasini ishga tushirganmiz.

Bu platforma Soliq qo‘mitasining elektron bazasiga integratsiya qilingan, yangi ishga qabul qilingan fuqarolarning soliq to‘lashdagi shaffofligini ta’minlash maqsadida, shuningdek, tegishli vazirlik idoralar ham o‘sha elektron bazalarga integratsiya qilindi.

2025-yilda dastur ijrosi doirasida 5,2 million aholini ish bilan band qilish hamda daromadli mehnat bilan ta’minlash maqsadida ayrim tashkilotlar mas’ul etib belgilandi.

Markaziy bank, Kambag‘allikni qisqartirish va bandlik vazirligi, Iqtisodiyot va moliya vazirligi:

• tadbirkorlarni moliyaviy qo‘llab-quvvatlash, ularning muammolarini hal etish hamda faoliyatini kengaytirish hisobiga 1 mln 470 ming nafar;
• ishsizlarni mavjud bo‘sh ish o‘rinlariga joylashtirish orqali 430 ming nafar;
• har bir mahallada o‘rtacha 40 tadan jami 377,6 mingta mikroloyihalarni amalga oshirish hisobiga 755 ming nafar, shuningdek, “Mahalla loyihasi” doirasida soddalashtirilgan tartibda loyihalarni moliyalashtirish uchun yangi kredit mahsulotlarini joriy qilish orqali 250 ming nafar;
• hududlarda “drayver” loyihalarni ishga tushirish hisobiga 122 ming nafar hamda mikrosanoat markazlarini barpo etish loyihalari hisobiga 21 ming nafar;
• aholiga yer maydonlarini ijaraga berish, shu jumladan, “kompaniya — kooperativ — dehqon xo‘jaligi” tamoyili asosida kooperativlar tashkil etish hisobiga 300 ming nafar;

Qishloq xo‘jaligi vazirligi, O‘zbekiston fermer, dehqon xo‘jaliklari va tomorqa yer egalari kengashi:

• aholi tomorqasidan samarali foydalanishni tashkil etish hamda fermer va dehqon xo‘jaliklarini qo‘llab-quvvatlash orqali 1 mln 169 ming nafar;

Investitsiyalar, sanoat va savdo vazirligi, Savdo-sanoat palatasi:

• investitsiya loyihalarini amalga oshirish hisobiga 290 ming nafar;

Qurilish va uy-joy kommunal xo‘jaligi vazirligi:

• qurilish sohasidagi loyihalarni amalga oshirish hisobiga 169 ming nafar;

Kambag‘allikni qisqartirish va bandlik vazirligi, Raqamli texnologiyalar vazirligi, Oliy ta’lim, fan va innovatsiyalar vazirligi:

• aholini kasb-hunar va tadbirkorlikka o‘qitib, ishga joylashtirish hisobiga 266 ming nafar aholini daromadli mehnat bilan taʼminlashga masʼul etib belgilandi.

Dasturning amalga oshirilishini moliyaviy qo‘llab-quvvatlash maqsadida 126 trillion so‘m yo‘naltiriladi.

Jumladan:

• tijorat banklarining kichik va o‘rta biznes subyektlarini moliyaviy qo‘llab-quvvatlash uchun 120 trillion so‘m kredit mablag‘lari, shundan 2,4 milliard AQSH dollari miqdoridagi xorijiy kredit liniyalari;
• og‘ir toifadagi 1000 ta mahallalar infratuzilmasini yaxshilash uchun 3,2 trillion so‘m byudjet mablag‘lari;
• tuman va shaharlarning ixtisoslashuvidan kelib chiqib, sanoat, qishloq xo‘jaligi va xizmat ko‘rsatish sohalarida tadbirkorlikning rivojlanishiga turtki beruvchi drayver loyihalar uchun zarur infratuzilmani yaratishga 1 trillion so‘m byudjet mablag‘lari;
• maqsadli jamg‘armalar orqali kambag‘allikni qisqartirish va aholi bandligini taʼminlashni rag‘batlantirish uchun 952 milliard so‘m.