Markaziy Afrika Respublikasi poytaxti Bangi shahridagi Bartelemi Boganda litseyida transformator podstansiyasi portlashi natijasida yuzaga kelgan tiqilinchda kamida 29 nafar o‘quvchi vafot etdi va ko‘plab o‘quvchilar tan jarohati oldi. Bu haqda shahar kasalxonasidagi manbalarga tayanib, Reuters agentligi xabar berdi.
MAR Ta’lim vazirligining ma’lum qilishicha, fojia Bangi shahridagi o‘rta maktabda joylashgan imtihon markazida oltita maktabning 5 mingdan ortiq o‘quvchi yakuniy imtihonlarni topshirayotgan paytda sodir bo‘lgan. Portlash natijasida yuzaga kelgan vahima fojiali tiqilinchga sabab bo‘lgan.
Mahalliy hokimiyat organlarining ma’lum qilishicha, kamida 29 kishi halok bo‘lgan va 260 kishi jarohatlangan. Barcha jabrlanganlar yaqin atrofdagi tibbiyot muassasalariga yetkazilgan.
“Maktabning asosiy binosida joylashgan transformator mamlakatning asosiy kommunal xizmati ko‘rsatuvchi ENERCA kompaniyasi xodimlari elektr ta’minotini tiklaganidan so‘ng portlab ketdi”, deya ta’kidlanadi vazirlik bayonotida.
Ta’kidlanishicha, rasmiy tergov boshlangan. Transformatorning portlash sabablari aniqlanmoqda hamda texnik ekspertiza o‘tkazilmoqda.
Izoh (0)