Mozambik shimolida isyonchilar tomonidan kamida 120 nafar bola o‘g‘irlab ketildi. Bu haqda Human Rights Watch (HRW) hisobotiga tayanib, CNN xabar berdi.
Kabo Delgado provinsiyasida odamlarni o‘g‘irlash holati ko‘paymoqda. Bolalarni mahalliy aholi orasida “ash-Shabab” nomi bilan tanilgan “Islom davlati”ga aloqador guruh o‘g‘irlagan. O‘g‘irlanganlardan talon-taroj qilingan tovarlarni tashish, majburiy mehnat qilish, ba’zi hollarda esa askar sifatida xizmat qilish uchun foydalanilmoqda. Bolalarni majburan turmushga berish holatlari ham uchramoqda.
Mozambik 2017-yildan beri Kabo Delgadudagi qo‘zg‘olonga qarshi kurashib keladi. Hukumat kuchlari Ruanda, Janubiy Afrika Respublikasi va boshqa mintaqaviy hamkorlar tomonidan yuborilgan qo‘shinlar yordamiga tayanib, zo‘ravonlikni to‘xtatish uchun kurashmoqda.
Isyonchilar 2020-yilda hujumlar to‘lqinini amalga oshirib, o‘nlab odamlarning, jumladan, bolalarning boshini tanasidan judo qilgandi. Guvohlarning aytishicha, shahar va qishloqlardan o‘g‘irlab ketilganlar jangari sifatida foydalanilgan.
Birlashgan Millatlar Tashkiloti ma’lumotlariga ko‘ra, zo‘ravonlik oqibatida 600 mingdan ortiq odam boshqa hududlarga ko‘chirilgan. HRW so‘nggi 2 oy ichida hujumlar va bolalarni o‘g‘irlash holatlari yana ko‘payganini ma’lum qilgan. Tashkilot Mozambik hukumatini bolalarni topish va kelajakdagi o‘g‘irliklarning oldini olish uchun harakat qilishga chaqirgan.
Norvegiya qochqinlar kengashi (NRC) bosh kotibi Yan Egeland iyun oyida Kabo Delgadoga tashrifida, vaziyatni “e’tibordan chetda qolgan inqiroz” deb atagandi.
“Iqlim muammolari, zo‘ravonlik va ocharchilikning kuchayishi aholiga dahshatli ta’sir ko‘rsatmoqda”, dedi Egeland.
NRC’ning ta’kidlashicha, 5 milliondan ortiq odam o‘ta og‘ir, 900 mingdan ortiq odam esa favqulodda ochlikni boshdan kechirmoqda.
Izoh (0)