Mali va Rossiya o‘zaro savdoni kengaytirish va iqtisodiy aloqalarni mustahkamlashga qaratilgan bir qator shartnomalarni imzoladi. Bu haqda BBC xabar berdi.
Shartnomalar atom energetikasi sohasida yanada ko‘proq hamkorlik qilishni ko‘zda tutadi. Ushbu kelishuvlar haqida Mali xuntasi rahbari polkovnik Assimi Kol Goytaning Moskvaga tashrifi chog‘ida e’lon qilingan. Rossiya prezidenti Vladimir Putin bilan 2 soatlik muzokaralar olib borilgan.
Goyta 2021-yilda hokimiyatni qo‘lga kiritganidan beri Rossiya bilan munosabatlarni yaxshilagan. Shu bilan birga sobiq mustamlakachi Fransiya bilan aloqalarni qisqartirgan. Qo‘shni Burkina Faso va Niger ham Rossiya bilan aloqalarni mustahkamlashga harakat qilmoqda.
Putin Mali bilan savdo aloqalari “kamtarona” bo‘lsa-da, o‘sish tendensiyasi borligini va kelajakdagi hamkorlik yo‘nalishlari geologiya-qidiruv, energetika, logistika va gumanitar sohada bo‘lishini bildirgan. Oldinroq Rossiya Mali uchun strategik energetika loyihasi sifatida ruslar tomonidan ishlab chiqilgan atom elektr stansiyasini qurishni muhokama qilgan edi.
“Ushbu rasmiy tashrif o‘zaro ishonch va suverenitetni hurmat qilish ruhida munosabatlarimizni yanada chuqurlashtirishga yordam beradi”, dedi Kol Goyta.
Harbiy hamkorlik Rossiya—Mali ittifoqining asosiy elementi bo‘lib qolmoqda. Rossiya yollanma qo‘shinlari Kol Goyta hukumatini ko‘p yillik aksilinqilobiy operatsiyalardan so‘ng Fransiya va BMT qo‘shinlari chiqarib yuborilganidan beri qo‘llab-quvvatlab kelmoqda.
“Vagner” guruhi yaqinda mamlakatni tark etgan, ammo yana bir kuch — Afrika korpusi hududda qolmoqda. Armiya Malida hokimiyatni qo‘lga olganida, davlat to‘ntarishiga asosiy sabab sifatida xavfsizlik bilan bog‘liq vaziyatning yomonlashuvini to‘xtatish zarurligini ko‘rsatgandi. Biroq mojaroni hal qilish va’dalariga qaramay, so‘nggi yillarda zo‘ravonlik kuchayib bormoqda.
Izoh (0)