Марказий Африка Республикаси пойтахти Банги шаҳридаги Бартелеми Боганда лицейида трансформатор подстанцияси портлаши натижасида юзага келган тиқилинчда камида 29 нафар ўқувчи вафот этди ва кўплаб ўқувчилар тан жароҳати олди. Бу ҳақда шаҳар касалхонасидаги манбаларга таяниб, Reuters агентлиги хабар берди.
МАР Таълим вазирлигининг маълум қилишича, фожиа Банги шаҳридаги ўрта мактабда жойлашган имтиҳон марказида олтита мактабнинг 5 мингдан ортиқ ўқувчи якуний имтиҳонларни топшираётган пайтда содир бўлган. Портлаш натижасида юзага келган ваҳима фожиали тиқилинчга сабаб бўлган.
Маҳаллий ҳокимият органларининг маълум қилишича, камида 29 киши ҳалок бўлган ва 260 киши жароҳатланган. Барча жабрланганлар яқин атрофдаги тиббиёт муассасаларига етказилган.
“Мактабнинг асосий биносида жойлашган трансформатор мамлакатнинг асосий коммунал хизмати кўрсатувчи ENERCА компанияси ходимлари электр таъминотини тиклаганидан сўнг портлаб кетди”, дея таъкидланади вазирлик баёнотида.
Таъкидланишича, расмий тергов бошланган. Трансформаторнинг портлаш сабаблари аниқланмоқда ҳамда техник экспертиза ўтказилмоқда.
Изоҳ (0)