Ijtimoiy tarmoqlarda Jizzaxda 8 nafar qiz “er kerak” yozuvi tushirilgan plakatni ko‘tarib yurgan videosi tarqaldi. Holat yuzasidan viloyat Oila va xotin-qizlar boshqarmasi maʼlumot berdi.
Maʼlum qilinishicha, mazkur holat yuzasidan viloyat hokimi o‘rinbosari — Oila va xotin-qizlar boshqarmasi boshlig‘i borib holatni o‘rgandi. Jizzax shahar hududidagi dehqon bozori ro‘parasida 8 nafar qiz salonda oq kelinlik ko‘ylagini kiyib olgan holda qo‘llariga “Er kerak” deb yozilgan plakatlarni ushlab, ko‘chada yurgan.
Tasvirlar salonni reklama qilish maqsadida salon rahbari hamda ijtimoiy tarmoq foydalanuvchisi (bloger) Sh.E.lar tomonidan tashkil etilgani, ular reklama videoroligi tayyorlamoqchi bo‘lgani aniqlandi.
Holat yuzasidan, Oila va xotin-qizlar boshqarmasi boshlig‘i darhol jarayonni to‘xtatib, qizlarga va go‘zallik saloni rahbariyatiga jamiyatda yurish-turish qoidalariga amal qilishi, milliy qadriyatlarni hurmat qilishi yuzasidan tushuntirish ishlari olib borildi.
Shu kabi holat Namanganda ham kuzatilgan edi. Davlatobod tumani “Navbahor” mahallasida yashovchi, 2007-yilda tug‘ilgan voyaga yetmagan qiz videosi go‘zallik saloni xodimlari tomonidan salon mijozlari va kanalidagi obunachilar sonini ko‘paytirish maqsadida olingan.
Izoh (0)