Kanadaning Alberta viloyatidan bo‘lgan Devid Serkin saratondan davolangach, bir necha urinishdan so‘ng lotereyalarda bosh yutuqni qo‘lga kiritdi. Erkakning omadi haqida The Guardian nashrida xabar berildi.
Erkakning aytishicha, 1982-yildayoq lotereya chiptalarini xarid qilishni boshlagan. Serkin chipta sotib olish va tekshirish jarayonini yoqtirishini taʼkidlagan.
O‘n yil oldin kanadalik birinchi marta 250 ming dollar yutib olishga erishgan. Keyinchalik Serkin 2024-yil avgustda 500 ming dollar, noyabrda 1 million dollar, 2025-yil mayda esa yana 1 million dollar yutdi. Qiziq tomoni shundaki, so‘nggi lotereya chiptasini u tasodifan o‘z shahri Letbrijdagi yonilg‘i quyish shoxobchasidan sotib olgan.
“Bilaman, bunday imkoniyat juda kam uchraydi va bu takrorlanmasa kerak, dedi Serkin. — Lekin baribir chipta sotib olishni yaxshi ko‘raman”. The Guardian maʼlumotiga ko‘ra, erkakning birinchi yutuqni qo‘lga kiritish ehtimoli 33,3 millionga 1 nisbatda bo‘lgan.
“Men saratonni yengib o‘tdim va hozir nafaqadaman, shuning uchun bularning barchasi uchun minnatdorman”, deb eʼtirof etdi Serkin. Erkak so‘nggi lotereyadan yutgan pulini rafiqasi bilan Gavayi orollariga sayohat qilishga sarfladi. Hozirda er-xotin Nyufaundlendga borishni rejalashtirmoqda.
Izoh (0)