O‘zbekistonda 361 nafar ota-onasi chet davlatlarda yurgan voyaga yetmaganlarga vasiy va homiylar tayinlandi.
Ichki ishlar vazirligi Jamoat xavfsizligi departamenti Axborot xizmati rahbari Muzifa Sultonovaning ma’lum qilishicha, “Dolzarb 90 kunlik” tadbirlari doirasida bolalarning huquq va manfaatlarini himoya qilishga qaratilgan qator ishlar amalga oshirilmoqda.
Jumladan, ota-onasi chet davlatlarda bo‘lib turgan 361 nafar voyaga yetmagan bolaga vasiy va homiylar tayinlandi. Bu orqali ularning huquqiy va ijtimoiy muhofazasi ta’minlanishiga e’tibor qaratildi.
Joriy yilda respublika bo‘yicha jami 189 ta stasionar va 1 239 ta kunduzgi oromgohlarda 300 mingdan ziyod bolalarning dam olishini tashkil etish rejalashtirilgan. 15-iyun holatiga ko‘ra, 180 ta stasionar oromgohlarda 36 464 nafar bola qabul qilindi.
Bolalarni oromgohlarga xavfsiz yetkazish maqsadida 1 379 ta avtobus ajratilib, qariyb 500 nafar yo‘l-patrul xizmati xodimlari biriktirildi. Mazkur chora-tadbirlar yozgi ta’til davrida bolalarning xavfsizligi va mazmunli dam olishini ta’minlashga qaratilgan.
Qashqadaryoda er-xotin uy olish maqsadida bir haftalik chaqalog‘ini 190 mln so‘mga pullagani haqida xabar berilgandi. Toshkent viloyatida bir yoshli o‘g‘lini 9 ming dollarga sotishga uringan er-xotinga sud hukmi o‘qilgani, Samarqandda ayol uy olish uchun 6 yoshli o‘g‘lini 6 ming dollarga sotmoqchi bo‘lganida qo‘lga olingani haqida xabar berilgandi.
Izoh (0)