Amazon kompaniyasi asoschisi, milliarder Jef Bezos ikki haftadan so‘ng jurnalist Loren Sanchesga uylanadi. Bu galgi nikoh marosimi avvalgilaridan ancha farq qiladi.
Birinchi safar Bezos Amazon’ni Sietldagi ijara uyining garajida ochishidan bir yil avval turmush qurgan edi. Marosim Vest Palm Bichda bo‘lib o‘tgan, nikoh shartnomasi esa deyarli tuzilmagan edi. Natijada ajrashganidan keyin uning sobiq rafiqasi Makkenzi Skott 165,3 milliard dollar bilan Yer yuzidagi eng badavlat insonlar ro‘yxatida 38-o‘ringa chiqdi. Bugun esa Bezos ancha boy va uning moliyaviy xavfsizligi uchun nikoh shartnomasi har tomonlama o‘ylangan tarzda puxta ishlab chiqilmoqda.
Dunyoning eng badavlat uchinchi odami sifatida Bezos o‘zining yuristlar jamoasi yordamida nikoh shartnomasini tuzdi. Bezos va Sanches 2023-yilda Kann sohillarida 500 million dollarlik yaxtada unashtirildi. Bezos imkon topilsa, hoziroq uylanar edi, ammo uning advokatlari barcha huquqiy hujjatlar rasmiylashtirilmaguncha bunga yo‘l qo‘ymayapti.
Oila huquqi bo‘yicha mutaxassis, advokat Alfonso Provinsianoning ta’kidlashicha, shartnomaning asosiy qismi Bezosning turmush qurishdan oldin to‘plagan ulkan boyligini himoya qilishga qaratilgan. Hujjatda Bezosga tegishli barcha biznes aktivlari va mol-mulkning to‘liq ro‘yxati ko‘rsatiladi hamda ular Sanchesga aloqasi bo‘lmagan shaxsiy mulk sifatida qayd etiladi.
“Bunday shartnomalarda umumiy qoidalardan biri shuki, agar er-xotin birga ishlasa yoki ikkinchi tomonning sarmoyasi kiritilsa ham, aktivlar faqat bir tomonga tegishli mulk bo‘lib qolaveradi. Bunday shartnomalar juda murakkab bo‘lishi mumkin, chunki har bir tafsilot ochiq va to‘liq bayon qilinishi shart”, deydi Provinsiano.
“Jarayon uzoq davom etadi va odatda har ikki tomonning yurist jamoalari ishtirok etadi. Aslida, Sanches tomonidagi yuristlarga ham Bezos to‘lov qilishi mumkin, lekin ular faqat Sanches manfaatini himoya qiladi. Shu sababli uzoq muzokaralar o‘tkazilmoqda va ikki tomon ham rozi bo‘ladigan yakuniy matn tayyorlanmoqda”, deya qo‘shimcha qildi u.
Bunday darajadagi moliyaviy kelishuv, albatta, o‘ta murakkab va yuqori darajadagi yuridik hamda moliyaviy maslahatchilar ishtirokida bo‘ladi. Jarayon faqat AQSHda emas, balki Bezos aktivlari joylashgan boshqa mamlakatlarda ham olib boriladi. Internetda esa buni hazilomuz tarzda “cheksiz” nikoh shartnomasi deb atashmoqda.
“Badavlat oilalarda nikoh shartnomasini tuzish bir necha oy davom etishi mumkin. Bu vaqt mobaynida har bir mol-mulk baholanadi, yuridik muzokaralar olib boriladi, shartnomalar ehtiyotkorlik bilan tuziladi. Jarayon shaffof va adolatli bo‘lishi kerak”, deydi Provinsiano.
Qog‘ozbozlik va huquqiy murakkabliklarga qaramay, Bezos va Sanches to‘yga qizg‘in hozirlik ko‘rmoqda. Ma’lumotlarga ko‘ra, Bezos deyarli butun Venetsiyani ijaraga olgan. Uch kunlik bayram uchun milliarder beshta hashamatli mehmonxonani band qilgan va hattoki oroldagi cherkovni ham ijaraga olgan. To‘y mehmonlari orasida Elton Jon va Ledi Gaga bo‘lishi, ular tantanada jonli ijro bilan ishtirok etishi aytilmoqda. To‘yning o‘zi esa, ehtimol, Bezosning 500 million dollarlik Koru yaxtasida o‘tadi. Bu kema shu darajada ulkan va dabdabaliki, unga hamrohlik qiluvchi 75 million dollarlik yana bir yaxta kerak bo‘ladi. Ikkala yaxta ham Venetsiya markazida to‘xtamaydi, chunki ularning o‘lchami shahar ekotizimiga salbiy ta’sir ko‘rsatishi mumkin.
Izoh (0)