Мексика президенти Клаудия Шейнбаум Лос-Анжелесдаги тартибсизликлар иштирокчиларининг хатти-ҳаракатларини қаттиқ танқид қилиб, зўравонлик норозилик шакли бўла олмаслигини таъкидлади ва АҚШдаги мексикалик фуқароларни провокацияларга учмасликка чақирди.
“Биз мамлакатда норозилик кўринишида содир бўлаётган зўравон ҳаракатларга мутлақо қаршимиз. Патрул машиналарини ёқиб юбориш қаршилик кўрсатишдан кўра провокацияга ўхшаб кетади. Шуни аниқ айтиш керакки, биз зўравонликни, у қаердан келиб чиқишидан қатъи назар, қоралаймиз. Мексикалик фуқароларни тинч йўл билан ҳаракат қилишга ва провокацияларга учмасликка даъват этамиз”, деди Шейнбаум Мексика ҳукумати томонидан узатилаётган матбуот анжуманида.
Шу билан бирга, Мексика раҳбари ҳукуматнинг миграция мақомидан қатъи назар, чет элдаги мексикаликларнинг ҳуқуқларини ҳимоя қилишга қатъий содиқлигини таъкидлади ва АҚШни миграция жараёнларида Мексика фуқароларининг ҳуқуқларига риоя қилишга ундаган.
“АҚШ ҳокимиятини барча миграция жараёнлари тегишли ҳуқуқий тартиб-қоидаларга мувофиқ, инсон қадр-қиммати ва қонун устуворлигини ҳурмат қилган ҳолда ўтказилишини таъминлашга қатъий чақирамиз”, дея қўшимча қилди Шейнбаум.
Президентнинг айтишича, Мексика “миграцияни жиноятлаштирувчи ва Қўшма Штатлардаги жамоаларимиз хавфсизлиги ҳамда фаровонлигига таҳдид солувчи амалиётларга ўз норозилигини билдириш” учун барча мавжуд дипломатик ва ҳуқуқий воситалардан фойдаланишни давом эттиради.
АҚШ иммиграция ва божхона полициясининг (ICE) 7 июнь куни Лос-Анжелес марказида ноқонуний муҳожирларни аниқлаш бўйича ўтказган рейдидан сўнг намойишчилар билан тўқнашувлар юз берди. Ўша куни Калифорния губернатори Гевин Ньюсом штат Трамп маъмурияти томонидан федерал молиялаштиришнинг эҳтимолий кенг кўламли қисқаришига жавобан федерал солиқларни тўлашдан бош тортиши мумкинлигини айтиб ўтди. Оқ уй матбуот котиби Каролин Левитт 8 июнь куни намойишлар фонида шаҳарга икки минг кишилик миллий гвардия кучлари киритилишини маълум қилди.
Калифорния губернатори Гевин Ньюсом АҚШ президенти Дональд Трампни норозилик намойишларини бостириш учун Лос-Анжелесга Миллий гвардия юборгани сабабли судга бермоқчилигини ма`лум қилди.
Изоҳ (0)