AQSHning Kaliforniya shtatida joylashgan jonivorlarni parvarishlash markazi — East Bay Vivariumda ikki boshli ilon dunyoga kelgani aniqlandi. Bu haqda Popular Science xabar berdi.
Muassasa xodimlari 7 oy oldin inkubatordan ilon bolasini olganida u ikki boshli ekanini aniqlagan. Ushbu turdagi ilonlar AQSHning g‘arbiy qismida yashaydi va yarim cho‘llarda, siyrak o‘rmonlarda, shuningdek, daryo bo‘yidagi butazorlarda hayot kechiradi.
Lampropeltis californiae ilonlarining uzunligi 1,5 metrgacha yetadi va odamlarga xavf tug‘dirmaydi. Ular kaltakesaklar, kemiruvchilar va boshqa ilonlar bilan oziqlanadi.
Tug‘ilgan ilon esa siam egizaklarining aniq namunasi bo‘lib, bunda ikki bola birga tug‘iladi va ularning tanalari birikkan bo‘ladi. Lekin ayrim ichki a’zolari alohida bo‘ladi. Ammo ikki boshli ilon holatida bitta to‘liq ishlaydigan ichki organlar bor. East Bay Vivarium xodimlarining aytishicha, ikkinchi bosh nafas oladi, atrofga qaraydi, tilini chiqaradi va agar nimadir bilan tegilsa, g‘azablanadi, biroq oziqlanmaydi. Ilon 7 oydan beri muvaffaqiyatli yashab kelmoqda.
Ilon ovqatlanish uchun dominant boshdan foydalanadi, ikkinchisi esa ozuqaga deyarli qiziqmaydi. Siam egizaklarining yashab qolishi juda kam uchraydigan hodisa. Hatto tug‘ilgan taqdirda ham ular uzoq yashamaydi. Chunki bunday holatlarda ikkita yurak, ikkita o‘pka va ikkita ovqat hazm qilish tizimi bo‘lishi mumkin — bu organlar o‘zaro raqobatga kirishadi yoki bir-birini qo‘llab-quvvatlashga majbur bo‘ladi.
“Agar bu ilonda ikkita faol ichki tizim bo‘lganida, u allaqachon nobud bo‘lgan bo‘lardi”, deydi xodimlar. Ularning aytishicha, agar ilon bir yoshga yetguncha yashab qolsa, uni boshqa, doimiy joyga ko‘chirish masalasi ko‘rib chiqiladi.
Izoh (0)