Walt Disney kompaniyasi Yaqin Sharqda ilk bor Disneyland qurilishini rasman tasdiqladi. Yangi ko‘ngilochar park Birlashgan Arab Amirliklarining Abu Dabi shahrida, Yas orolida joylashadi.
Loyihaning hamkori sifatida mahalliy “Miral” kompaniyasi ishtirok etadi. Bu kompaniya avval ham Abu Dabida bir nechta yirik turistik loyihalarni amalga oshirgan.
Rasmiy bayonotga ko‘ra, bu loyiha Disney’ning mintaqadagi eng muhim tematik kurorti bo‘lib, u Disney, Pixar, Marvel va Lucasfilm kabi mashhur brendlar asosidagi noyob zonalarni o‘z ichiga oladi. Parkning umumiy maydoni 100 gektardan oshadi. U yerda mehmonxonalar, do‘konlar hamda restoranlar bo‘ladi. Loyihaning konsepsiyasi mintaqa madaniyatiga mos tarzda ishlab chiqiladi.
Arxitektura va tematik rejalashtirish ishlari taxminan ikki yil davom etadi. Undan keyin qurilish ishlari yana 6 yil davom etishi kutilmoqda. Shu bois, parkning ochilishi 2032-yildan oldinroq bo‘lmaydi. Hozircha ochilish sanasi va loyiha qiymati aniq ko‘rsatilmagan, biroq bu milliardlab dollar miqdoridagi investitsiyalarni o‘z ichiga olishi aytilmoqda.
Dunyo tarixidagi birinchi Disneyland 1955-yil 17-iyulda AQSHning Kaliforniya shtatidagi Anahaym shahrida ochilgan. U Walt Disney’ning bevosita rahbarligida yaratilgan bo‘lib, keyingi loyihalarga asos bo‘lgan. Bugungi kunda dunyo bo‘ylab oltita yirik Disney kurorti mavjud.
Abu Dabidagi bu yangi park yettinchi Disneyland bo‘ladi va Disney brendining yangi mintaqalardagi ishtirokini kengaytirish yo‘lida muhim qadam hisoblanadi.
Izoh (0)