Turkiyaning Alaniya shahridagi trassada qozog‘istonlik sayyohlar bo‘lgan ekskursiya avtobusi yuk mashinasi bilan to‘qnashib ketdi, ikki kishi halok bo‘ldi, 12 kishi jarohat oldi. Bu haqda NTV xabar berdi.
Ma’lum qilinishicha, hodisa Okurjalar qishlog‘i yaqinida D-400 trassasida yuz bergan. Mikroavtobus svetoforda turgan yuk mashinasiga borib urilgan. Voqea joyida politsiya, jandarmeriya va tibbiy guruhlar ishlamoqda.
“Sayyohlik furgonining haydovchisi va ukrainalik gid voqea joyida halok bo‘lgan. Hodisa oqibatida 12 nafar sayyoh jarohatlangan. Ulardan 6 nafari og‘ir tan jarohati bilan Alaniya va Manavgat tumanlaridagi shifoxonalarga yetkazilgan”, — deyiladi xabarda.
Hozirda yuk mashinasi haydovchisi so‘roq qilinmoqda. Qozog‘iston konsuli YTH sodir bo‘lgan joyga ketgan.
Izoh (0)