Aholi soni bo‘yicha O‘zbekistonda ikkinchi o‘rinda turuvchi Namanganga jamoatchilik va yo‘l harakati xavfsizligini ta’minlashga mo‘ljallangan 25 ta “Sergek” tizimlari o‘rnatildi. Bu haqda “Daryo” nashrining Qozog‘istondagi muxbiri xabar berdi.
“Namangandagi ‘Sergek’ yo‘l-transport hodisalarini kamaytirish va haydovchilik madaniyatini oshirishga qaratilgan. Intellektual tizim O‘zbekiston qonunchiligi bo‘yicha sertifikatlangan. 25 ta apparat-dasturiy majmua shahar va viloyat tumanlaridagi 13 ta uchastkada yo‘l-harakati qoidalarining buzilishini qayd etadi. Bundan tashqari, ‘Sergek’ jinoyatlarning fosh etilishini kuchaytirishga xizmat qiladi”, — deydi KazakhExport kompaniyasi matbuot xizmati.
“Sergek” tizimi Qozog‘istonning Sergek Group kompaniyasi tomonidan ishlab chiqilgan. Loyiha xususiy investitsiyalar hisobidan amalga oshirilib, davlat eksport dasturi doirasida subsidiyalanadi. Xususan, kreditlash borasida KazakhExport “Eksport sug‘urta kompaniyasi” AJ yordam bergan. Biznes-loyiha Qozog‘iston Savdo va integratsiya vazirligi hamda Raqamli rivojlanish va aerokosmik sanoat vazirligi qo‘llab-quvvatlovi ostida ish boshlagan.
Bugungi kunda tizim Qozog‘istonning sakkizta shahrida ishga tushirilgan: Ostona, Ust-Kamenogorsk, Olmaota, Atirau, Chimkent, Semey, Taroz va Turkiston. “Sergek” ishga tushirilganidan keyin bir yil ichida Ostonadagi yo‘l-transport hodisalari oqibatida halok bo‘lganlar soni 60 kishidan 34 ga tushgan. Olmaotada esa 2019—2022-yillarda ushbu ko‘rsatkich 161 nafardan 96 nafarga tushga. Chimkentda 2020—2022-yillar davomida — 76 nafardan 57 nafarga.
Svetlana Shesternyova, Olmaota
Izoh (0)