Migratsiya agentligi 9-yanvar kuni Qozog‘istonda bo‘lib turgan va tranzit yo‘nalishida harakatlanayotgan O‘zbekiston fuqarolarini ob-havo sharoiti bo‘yicha ogohlantirish bilan chiqdi.
Ma’lum qilinishicha, Qozog‘iston hududlarida ob-havoning keskin sovushi natijasida yo‘llarda harakatlanish bilan bog‘liq noqulayliklar yuzaga kelmoqda. Magistral yo‘llarda kuchli qor bo‘ronlari hamda muzlash holatlari kuzatilmoqda. Bu esa avtoyo‘llarda harakatlanishda qiyinchiliklar keltirib chiqarmoqda.
“Shu munosabat bilan, qo‘shni davlatda bo‘lib turgan O‘zbekiston fuqarolaridan yo‘llarda harakatlanishda barcha xavfsizlik qoidalariga qat’iy rioya qilishni, juda zarur bo‘lganda poyezd yoki samolyotga chiqishlarini, zarurat bo‘lmaganda uzoq masofali yo‘llarda transport vositalarida harakatlanmay turishlaringizni so‘raymiz”, deyiladi agentlik xabarida.
2024-yil oktyabr oyi o‘rtalarida Qozog‘istonning Mang‘istau viloyatidagi trassada sodir bo‘lgan YTH oqibatida olti nafar O‘zbekiston fuqarosi halok bo‘lgandi. Qurbonlar orasida ikki nafar bola ham bor edi. Ular Rossiyadan O‘zbekistonga qaytayotgan bo‘lgan.
2025-yil 10-yanvar kuni Qozog‘istonda harorat kechasi 10 daraja sovuq atrofida, ba’zi joylarida 23 daraja sovuq bo‘ladi. Oqmo‘la, Turkiston, Kostanay, Pavlodar, Shimoliy Qozog‘iston viloyatlarida qor bo‘roni, tuman tushishi, yo‘llarda muzalamalar bo‘lishi prognoz qilingan.
Izoh (0)