Qozog‘istonda odamlar bo‘lgan avtomobil daryoga qulab tushdi

Qozog‘istonning Abay viloyati Irtish daryosiga tushib ketgan ikki yo‘lovchi avtomobili qidirilmoqda. Bu haqda Tengrinews xabar berdi.

FVV matbuot xizmatiga ko‘ra, hodisa 5-yanvar kuni soat 06:00 larda yuz bergan. Yengil avtomobil haydovchisi beton to‘siqqa urilib, daryoga qulab tushgan. YTH vaqtida salon ichida 4 kishi bo‘lgan. Yo‘lovchilardan biri mashinadan o‘zi chiqib, qirg‘oqqacha suzib borgan. U tibbiy yordamga muhtoj bo‘lmagan.

“Hodisa haqida xabar kelib tushgach, FVV xodimlari zudlik bilan voqea joyiga chiqib, qidiruv-qutqaruv ishlarini boshlagan. Qidiruv guruhi soat 09:00 da bir nafar marhumning jasadini topib, suvdan olib chiqqan va keyingi tergov harakatlarini o‘tkazish uchun politsiya organlariga topshirgan”, deyiladi xabarda.

Hozirda qutqaruv operatsiyasiga 55 nafar qutqaruvchi, 5 ta suzish vositasi, 2 ta dron, suvosti qidiruvlari uchun exolot, 10 ta texnika jalb qilingan.

Operatsiyani kuchaytirish uchun qo‘shimcha ravishda 68303-harbiy qismdan Qozog‘iston Favqulodda vaziyatlar vazirligi harbiylari jalb qilingan, shuningdek, Sharqiy Qozog‘iston viloyatidan qutqaruv bo‘linmalari kelishi kutilmoqda.