Qozog‘istonning Jambul viloyatida ichida O‘zbekiston fuqarolari bo‘lgan avtobus yo‘l-transport hodisasiga uchradi, deb xabar beradi FVV matbuot xizmati.
Ma’lum bo‘lishicha, 15-iyun kuni Qozog‘iston vaqti bilan soat 03:10 da Jambul tumanidan o‘tuvchi Olmaota—Toshkent avtomobil yo‘lining 545 kilometrida Qozog‘iston “Qizil tan” qishlog‘idan 7 kilometr uzoqlikda trikotaj mahsulotlari ortilgan yuk mashinasining yonishi oqibatida, avtomobil yo‘lida tirbandlik yuzaga kelgan. Natijada soat 03:40 larda ushbu yo‘nalishda harakatlanayotgan yuk mashinasi ikkita yo‘lovchi tashish avtobusi va 1 ta yengil avtomobil bilan to‘qnashuv sodir etgan. To‘qnashuv oqibatida ushbu avtotransport vositalarida yong‘in kelib chiqqan.
Yong‘in sodir bo‘lgan avtobuslarning birida 31 nafar O‘zbekiston fuqarosi bo‘lgan va ulardan 3 nafari o‘rta darajada tan jarohati bilan Taraz shahar tibbiyot maskaniga olib borilgan. Hozirda ushbu fuqarolarga malakali tibbiy yordam ko‘rsatilmoqda.
“Qozog‘iston mas’ullari yuzaga kelgan mazkur baxtsiz hodisa oqibatlarini zudlik bilan bartaraf etish, jarohatlanganlarga tez tibbiy yordam ko‘rsatishda yaqindan ko‘mak berishmoqda. Holat yuzasidan Qozog‘iston Favqulodda vaziyatlar vazirligi bilan ma’lumot almashinuvi davom etmoqda”, — deyiladi xabarda.
Eslatib o‘tamiz, 2020-yilning martida Qozog‘istonda 26 nafar o‘zbekistonlik bo‘lgan avtobus ag‘darilib ketgan, 2019-yilda Qozog‘istonda Rossiyadan qaytayotgan o‘zbekistonliklar ishtirokida YTH sodir bo‘lishi oqibatida bir kishi halok bo‘lgan, 2018-yil yanvarida Aqto‘be viloyati hududida ichida O‘zbekiston fuqarolari bo‘lgan avtobus yonib ketgan va 52 o‘zbekistonlik halok bo‘lgan edi.
Izoh (0)