Ukrainalik tadbirkor va siyosatchi Aleksandr Onishchenko O‘zbekistonga ko‘chib keldi. Bu haqda uning “Strana.ua”ga bergan intervyusiga tayanib, Spot xabar berdi.
Aleksandr Onishchenko kim?
Onishchenko 1969-yilda Rossiyada tug‘ilgan. 1990-yildan boshlab yoqilg‘i va energetika sohasidagi biznes bilan shug‘ullanadi.
2007-yilda Ukraina FVV vaziri yordamchisi lavozimiga tayinlangan. 2014-yilda Ukraina Oliy radasi xalq deputatiga aylangan. 2016-yilda mamlakatni tark etgan. 2017-yilda nomi oshkor etilmagan mamlakatdan siyosiy boshpana olgan.
2021-yil boshida AQSh Moliya vazirligining SDN List sanksiyalar ro‘yxatiga kiritilgan bo‘lib, unga ko‘ra, Qo‘shma Shtatlardagi aktivlari bloklangan, shuningdek, Amerika fuqarolarining u bilan biror operatsiyani o‘tkazishi taqiqlangan.
“Fokus” jurnali uning ismini ikki marta — 2011 va 2012-yillarda Ukraining eng boy insonlari ro‘yxatiga kiritgan. Biznesmenning to‘liq biografiyasi bilan quyidagi havola orqali tanishish mumkin.
“Ukrainadagi birinchi biznesim O‘zbekiston va Turkmanistonga bog‘liq. Shu ma’nodaki, sekin-asta ildiz otib, Turkmanistondan Ukrainaga gaz eksport qilishni boshladim”, — deydi u.
Tadbirkor o‘zining ko‘chib o‘tishini Yevropa Ittifoqida biznes inqirozi yuz berayotgani bilan izohlangan — koronavirus iqtisodiyotni yakson qilgan, so‘nggi yarim yilda barchasi qulagan, O‘zbekistonda esa pandemiya yakunlanib, iqtisod gullab-yashnashni boshlagandek go‘yo.
“Bu yerda barcha tabiiy tanlanish hisobiga kasallikka chalinib, sog‘aygandek. Kecha boks kechasida bo‘ldim. O‘n ming odam sport saroyida. Hech qanday vahima yo‘q. Bundan oldin o‘n ming kishi Nikolay Baskovning konsertida yig‘ilgandi. Barcha restoranlar ochiq, barchasi ishlayapti. Iqtisod rivojlanmoqda. Siz katta iqtisodiy ko‘rgazma boshlanishiga yetib keldingiz (gap ‘Innoprom’ haqida ketmoqda — tahr)”, — deydi Onishchenko.
“Hukumat xususiylashtiriladigan obyektlar ro‘yxatini e’lon qiladi. O‘zbekiston chegaralarni ochmoqda”, — deydi Onishchenko.
Tadbirkorning aytishicha, uning mamlakatga shaxsiy qiziqishlari bor (oltin, kimyo sanoati, mineral o‘g‘itlar), shuningdek, investorlar nomidan ish olib bormoqda (ularni mamlakat iqtisodiyoti bilan tanishtirmoqda). Uning so‘zlariga ko‘ra, bu yerda “aqlbovar qilmas bozor ochilgan”: “Xitoy va Qozog‘iston barcha narsani sotib olyapti. Yevropa bozori Rossiya va sobiq MDH davlatlari uchun yopilishni boshladi. Ular to‘liq Xitoy va Yaqin Sharq mamlakatlari tarafi o‘tdi, o‘z mahsulotlarini keng ko‘lamli eksport qilmoqda: gaz, elektr energiyasi. Hozirda O‘zbekiston investorlarni jalb etish uchun global xususiylashtirishni tayyorlamoqda. Yuzlab obyektlar sotuvga qo‘yiladi. Bu yerda ‘Gazprom’, ‘Lukoyl’, ‘Rosatom’ kirib ulgurdi, kirganlar iqtisodiyotga katta mablag‘ kiritmoqda”, — deydi u. Onishchenkoning so‘zlariga ko‘ra, bu hokimiyat tufayli amalga oshirilmoqda.
Onishchenkoning aytishicha, ish kunlari u O‘zbekistonda, dam olish kunlari esa Yevropada bo‘lmoqda. Unga bu yerda nima yoqishi borasidagi savolga tadbirkor “narxlar hamyonbop, mazali oshxona va barchasi bor, shuningdek, otasi oldida ekanligini” ta’kidlagan.
Ot sporti
Aleksandr Onishchenko 1998-yildan buyon ot sporti bilan professional ravishda shug‘ullanib keladi. Ukraina ot sporti federatsiyasi prezidenti ham bo‘lgan, ikki marotaba Olimpiada o‘yinlarida ishtirok etgan, ko‘plab xalqaro musobaqalar g‘olibi va sovrindori.“Endilikda harakatlarim va imkoniyatlarim O‘zbekistonga qaratiladi. Bu yerda ot — e’zozlanadigan hayvon. Otda chiqish qilgan inson — barcha gunohlari kechiriladigan taqvodor hisoblanadi”, — deydi Onishchenko.
U mamlakatda ot sporti o‘rtacha rivojlangani to‘g‘risidagi savolga qo‘shilgan, mamlakatda endi-endi otlarni sotib olib, infratuzilma va sportchilarga sarmoya kiritayotgan biznesmenlar paydo bo‘lmoqda.
Onishchenkoning so‘zlariga ko‘ra, unga turli mamlakatlar terma jamoalaridan, xususan, O‘zbekistondan takliflar tushmoqda. Onishchenko rozi bo‘lishini istisno etmagan, chunki otasi sabab fuqarolikni osonlikcha olishi mumkin, biroq hozir yaxshilab o‘ylab ko‘rib, qaror qabul qilishga vaqt bor.
Shuningdek, u hozirda 52 yoshda ekanligini va siyosat bilan shug‘ullanishni istamasligini ta’kidlagan. “Ot sporti va biznes. Menga shu yetarli”, — deydi Onishchenko.
Avvalroq Janubiy Afrikada ta’qib qilinayotgan aka-uka Guptalar O‘zbekistonga kelgani to‘g‘risida xabar berilgandi.
Izoh (0)