AQSH vitse-prezidenti J.D. Vans Fox News telekanali bilan suhbatda Rossiyaning Ukrainaga nisbatan hududiy da’volariga to‘xtalib, ularni asossiz deb atadi. Siyosatchi, shuningdek, Qo‘shma Shtatlar har qanday ssenariyda ham Ukraina suverenitetini saqlab qolish tarafdori bo‘lib qolishini aytdi.
“Rossiya hali egallamagan hududlarni hadya sifatida olishni kutmasligi kerak”, dedi Vens.
U bu fikrni Rossiyaning tinchlik muzokaralaridagi pozitsiyasi va Vashingtonning bu boradagi munosabati haqidagi savolga javoban aytdi.
Vensning bildirishicha, AQSH Rossiya haddan tashqari ko‘p talablar qo‘yishini kutgandi.
“Hamma bilgan edi — Rossiya haddan tashqari ko‘p narsa so‘raydi. Chunki ular front chizig‘ida o‘zlarini g‘olib sifatida his qilishmoqda”, dedi u.
Vens, shuningdek Ukraina “ishlari yaxshi ketmayotgani” uchun sulhga rozi bo‘lishini aytdi.
“Biz Ukraina qulashini xohlamaymiz. Biz, albatta, uning suveren davlat bo‘lib qolishini istaymiz. Ammo Rossiya hali zabt etmagan hududni shunchaki so‘ray olmaydi”, degan siyosatchi.
AQSH vitse-prezidenti Oq uyning muzokaralardan chiqishi ehtimoliga ham to‘xtaldi. Uning ta’kidlashicha, agar Rossiya bu jarayonda samimiy bo‘lmasa, Vashington vositachilik rolidan voz kechadi.
“Biz boshidanoq Rossiyaning dastlabki talablari haddan tashqari yuqori bo‘lishini bilar edik. Ular o‘zlarini ‘mo‘tadil’ ko‘rsatish uchun ko‘p narsani so‘rashadi. Bu meni xavotirga solmaydi. Ammo agar ular jarayonda halol ishtirok etmayotganini bilsak, albatta, muzokaralardan chiqib ketamiz”, dedi vitse-prezident.
Shunga qaramay Vens muzokaralarning o‘zini muhim siljish deb hisoblaydi. Unga ko‘ra, Rossiyaning tinchlik rejasini taklif qilgani ham, Ukrainaning aniq takliflar bilan chiqayotgani ham ijobiy jarayondir.
“Biz ushbu ikki tomon o‘rtasida masofani qisqartirishga harakat qilishimiz kerak. Bu uzoq muddatli tinchlikka erishish yo‘lidagi yagona choradir. Hozircha kerakli nuqtaga yetmadik, ammo bu boradagi harakatlarda davom etamiz”, deya so‘zlarini yakunladi u.
Tinchlik muzokaralari
Rossiya va Ukraina o‘rtasidagi urushni to‘xtatish bo‘yicha muzokaralar AQSH vositachiligida davom etmoqda. Vashington agar hech qanday natija bo‘lmasa, vositachi rolidan voz kechishi mumkinligini bir necha bor ta’kidlagan.
Bu orada Ukraina AQSH tomonidan ilgari surilgan 30 kunlik to‘liq sulh rejasiga rozilik berdi. Ammo Rossiya buni rad etib, qator shartlarni ilgari surgan.
Izoh (0)