Pokiston harbiy havo kuchlari 7-may kunidagi janglarda Hindistonning kamida ikkita samolyotini Xitoydan sotib olingan qiruvchilar yordamida urib tushirgan. Buni Reuters bilan suhbatlashgan AQSH rasmiylari tasdiqladi. Biroq Hindiston vakili agentlikning holat bo‘yicha izoh berish so‘rovini qanoatlantirmadi.
Ma’lum bo‘lishicha, Pokiston hind samolyotlariga qarshi Xitoyning J-10 qiruvchilarini havoga ko‘tarib, PL-15 raketalari bilan zarba bergan. Oqibatda Hindistonning kamida ikkita qiruvchisi urib tushirilgan. Ulardan biri Fransiyada ishlab chiqarilgan Rafale bo‘lgan. Reuters bilan suhbatlashgan har ikki rasmiy ham AQSHda ishlab chiqarilgan F-16 samolyotlari bu safargi janglarda qatnashmaganini ma’lum qildi.
Dehli qiruvchi samolyotlari urib tushirilgani haqidagi da’volarni tasdiqlamadi. Hind rasmiylari Pokiston hududida joylashgan “terrorchilik infratuzilmasi”ga qarshi amaliyot muvaffaqiyatli o‘tganini ta’kidlamoqda.
Pokiston mudofaa vaziri Xavojа Muhammad Asif Reutersga intervyu berib, Hindistonning uchta Rafale samolyoti J-10 qiruvchisi yordamida urib tushirilganini ma’lum qildi. Islomobod, umuman olganda, beshta hind samolyoti safdan chiqarilganini bildirdi.
Jangovar imkoniyatlar sinalmoqda
Pokiston foydalanayotgan J-10 va Hindiston harbiy havo kuchlari safida xizmat qilayotgan Rafale samolyotlarining har ikkalasi ham 4,5 avlodga mansub bo‘lib, zamonaviy texnologiyalarga ega. Mudofaa sanoati bo‘yicha mutaxassislar G‘arb va Xitoy namunasidagi qurollarning real jangda to‘qnashishi kelajakdagi qurolli mojarolar uchun muhim tajriba bo‘lishini aytmoqda. Biroq ular yakuniy xulosa uchun hozircha biroz ertaligini ham qo‘shimcha qilgan.
Izoh (0)