Yevropa bilan gaz urushidan keyin eksportning deyarli 60 foizini yo‘qotgan va Xitoy bilan yangi shartnoma imzolanishini kutmagan “Gazprom” maishiy texnika ishlab chiqarishga qaror qildi. Bu haqda “Kommersant” xabar berdi.
Rossiya gaz monopoliyasining sho‘ba korxonasi hisoblangan “Gazprom maishiy tizimlari” AJ shu yildan kir yuvish mashinalari va muzlatgichlar ishlab chiqaradi.
“Gazprom” yozda Bosch zavodini qayta ishga tushirmoqchi. Urushdan oldin bu korxona yiliga 1 milliondan ortiq muzlatgich va kir yuvish mashinasi ishlab chiqargan, deydi manbalar.
Biroq zavod faoliyatini tiklashda dasturiy ta’minot bilan bog‘liq muammolar yuzaga kelishi mumkin. Chunki Bosch kompaniyasi Rossiyadan chiqib ketgan va zavodda ishlatiladigan dasturiy ta’minot litsenziyasini ham o‘zi bilan olib ketgan.
“Gazprom maishiy tizimlari” allaqachon gaz plitalarini ishlab chiqarmoqda. 2024-yili kompaniya 6,6 milliard rubl daromad va 140 million rubl sof foyda ko‘rdi.
Agar “Gazprom” o‘z brendi ostida texnika ishlab chiqarishni boshlasa, u Janubiy Koreyaning LG, Samsung, Xitoyning Haier, Hisense va boshqa kompaniyalari bilan raqobatda yutqazadi, Bosch brendi ostidagi texnika hali ham parallel import orqali yetkazib berilmoqda va o‘z xaridoriga ega, bozor allaqachon shakllangan, deya ogohlantirdi Jacky’s maishiy texnika brendi asoschisi Guseyn Imanov.
“Gazprom”ning asosiy gaz savdosi 2024-yilda zarar bilan yakunlandi. Jumladan, bir yil avvalgi 695,57 milliard rubl zarar o‘rniga 1,076 trillion rublni tashkil etdi. Ukrainaga bosqin boshlanganidan ko‘p o‘tmay, Yevropaning aksariyat davlatlarini gazdan uzib qo‘ygan “Gazprom” eksportning deyarli uchdan ikki qismini yo‘qotdi: 2023-yilda uning hajmi 1985-yildan beri eng past darajaga tushdi — 69 milliard kub metr.
Izoh (0)