Slovakiya Ukraina orqali gaz tranzitini to‘xtatish oqibatida yiliga taxminan 500 million kub metr xom ashyoni yo‘qotadi. Bu haqda respublika bosh vaziri Robert Fitso ma’lum qildi. Shu munosabat bilan u Ukraina prezidenti Vladimir Zelenskiyni gaz tranziti bo‘yicha muzokaralarga taklif qildi.
“Men ish dasturingizning jiddiyligini to‘la anglagan holda sizni uchrashuvga taklif etmoqchiman. Bunday uchrashuv Slovakiya va Ukraina hududi orqali boshqa mamlakatlarga gaz yetkazib berish, shuningdek, 31-dekabr kuni Ukraina va Rossiyaning tegishli kompaniyalari o‘rtasidagi shartnoma bekor qilinishini hisobga olgan holda mumkin bo‘lgan texnik yechimlar haqida ochiq suhbat o‘tkazish uchun qulay sharoit yaratadi”, deb yozadi Fitso Facebook’dagi sahifasida.
Joriy yilning 1-yanvar kuni “Gazprom” Ukrainaning “Naftogaz” kompaniyasi bilan shartnoma muddati tugaganligi sababli Ukraina orqali Yevropaga gaz yetkazib berishni to‘xtatdi. Fitso avvalroq Slovakiya Rossiya gazi tranzitining to‘xtatilishi tufayli Ukrainaga nisbatan qat’iy choralar ko‘rishga tayyorligini ma’lum qilgandi.
U, shuningdek, Rossiya prezidenti Vladimir Putin Slovakiyaga gaz yetkazib berish barqaror tarzda amalga oshirilishini kafolatlagani haqida aytgan. 10-yanvar kuni Fitso shartnoma muddati tugagan bo‘lsa-da, “Gazprom” respublikaga gaz yetkazib berishni yo‘lga qo‘ya olishi mumkinligini qayd etgan.
Avvalroq Slovakiya bosh vaziri Zelenskiyning harbiy yordam so‘rashini tanqid qilib, uni “tilanchi” deb atagandi.
Robert Fitsoning bayonoti parlament qo‘mitasining yig‘ilishida yangradi. Unda bosh vazir Ukraina orqali Rossiya gazining Slovakiyaga tranzitini to‘xtatish oqibatlari haqida gapirdi. Fitso Ukraina yetakchisini ishonchsiz deb atab, “bo‘g‘zimgacha to‘ydim”, deya norozilik bildirdi.
“Men bu yerga Zelenskiy bilan bir safda bo‘lish uchun kelganim yo‘q. Tan olaman, bu mening jonimga tegdi. U Yevropani kezib yuribdi, tilanchilik qilib, shantaj qilib, boshqalardan pul so‘rab yuradi. Bu narsaga chek qo‘yish vaqti keldi”, dedi Slovakiya bosh vaziri.
Slovakiya prezidenti Peter Pellegrini shu munosabat bilan Ukrainaga tashrif buyurishdan bosh tortishini ma’lum qildi. U prezidentlik lavozimida barcha qo‘shni mamlakatlarga tashrif buyurgan, biroq avvalroq bunday tashrif rejasini e’lon qilgan bo‘lsa-da, shu paytgacha Kiyevda bo‘lmagan.
“Bunday vaziyatda hozircha mening Ukrainaga borishim haqida gap bo‘lishi mumkin emas. Agar men u yerga faqat surat olish uchun borishim kerak bo‘lsa-yu, Slovakiyaga bir tomchi ham neft va gaz bormasligi aytilsa, u holda mening u yerga borishimning hojati yo‘q. Hech kim mendan xafa bo‘lmasin”, degan u.
Fitso Kiyevning qarorini “o‘ta siyosiy” deb atagan va bu qaror Slovakiyaga ham, butun Yevropa Ittifoqiga ham zarar yetkazishini bildirgan. Bunga javoban u elektr energiyasi yetkazib berishni to‘xtatish, ukrainalik qochqinlarga beriladigan nafaqalarni qisqartirish, Ukrainaning Yevropa ittifoqiga a’zo bo‘lishini to‘sib qo‘yish va Kiyevga insonparvarlik yordamini yuborishni to‘xtatish bilan tahdid solgan.
Izoh (0)