Forbes jurnali Rossiyaning eng yirik kompaniyalarining sof foyda hajmi bo‘yicha yillik reytingini e’lon qildi. Avvalgi yillar ro‘yxatda peshqadamlik qilib kelgan “Gazprom” konserni hatto birinchi yuztalikka ham kira olmadi.
Forbes ma’lumotiga ko‘ra, 2023-yili “Gazprom” 583 milliard rubl zarar bilan yakunlagan. Rossiyaning “Kommersant” nashri esa zararni 629 milliard rublga baholamoqda. Har qanday holatda ham, bu 25 yil ichidagi eng yuqori ko‘rsatkich bo‘lib, Rossiya gaz konserni 1,23 trillion rubl foyda olgan 2022-yilga nisbatan keskin tafovutni ko‘rsatadi.
Kompaniya muammolarining asosiy sababi eng ko‘p foyda keltirgan Yevropa Ittifoqi bozorining yo‘qotilishi ekani aytilmoqda. “Kommersant” ma’lumotlariga ko‘ra, 2023-yilda Yevropaga quvur orqali gaz yetkazib berish hajmi bir yil avvalgi 62 milliard kub metrga nisbatan 24 milliard kub metrgacha tushib ketgan. Ichki hisobotga ko‘ra, yaqin yillarda Rossiya gaz giganti urushdan oldingi savdo hajmini tiklashga erisha olmaydi.
Rossiyaning eng daromadli kompaniyalari reytingining yangi peshqadami “Rosneft” bo‘ldi. U 2023-yil yakunlari bo‘yicha 1,529 trillion rubl sof foyda olishga erishdi. Reytingning eng yaxshi 100 ta kompaniyasining umumiy daromadi o‘tgan yilgi 9,27 trillion rublga nisbatan 13,2 trillion rubldan oshgan.
Izoh (0)