Hindiston bosh vaziri Narendra Modi AQSH prezidenti Donald Tramp bilan bo‘lgan telefon suhbati yakunida har ikki davlat o‘zaro manfaatli va ishonchli hamkorlikka intilayotganini ma’lum qildi.
Qadrli do‘stim AQSH prezidenti Donald Tramp bilan suhbatlashganimdan xursandman. Tramp prezidentligining tarixiy ikkinchi muddati bilan tabrikladim, deb yozdi Narendra Modi X ijtimoiy tarmog‘ida.
Modining bayonotida ta’kidlanishicha, Nyu-Dehli va Vashington “o‘zaro manfaatli va ishonchli” hamkorlikka intilmoqda.
Biz xalqlarimiz farovonligi, umumiy tinchlik, taraqqiyot va xavfsizlik yo‘lida birgalikda harakat qilamiz, deya ishonch bildirdi u.
Hindiston bosh vaziri saylov natijalari e’lon qilinganidan so‘ng Tramp bilan telefon orqali suhbatlashgan va uni g‘alaba bilan tabriklagan dastlabki uch nafar davlat rahbari qatoriga kirdi. News18 telekanalining xabar berishicha, 5-noyabrdagi ovoz berish arafasida hind brahmanlari Dehlida Trampning g‘alabasi uchun jamoaviy ibodat qilib, hinduizm qoidalariga ko‘ra sehrli marosimlar o‘tkazishgan.
Avvalroq Qo‘shma Shtatlar Hindistondan 27-fevralgacha AQSH sanksiyalariga uchragan Rossiya tankerlaridan neftni tushirishi va 12-martgacha ular bilan barcha moliyaviy operatsiyalarni yakunlashini talab qilgan edi.
Tegishli tushuntirishlar Hindiston neft vazirligiga yetkazilgani haqida uning rahbari Pankaj Jain ma’lum qildi, deb xabar bermoqda Reuters.
Pankaj Jain Hindiston Rossiya neftini G‘arb tomonidan belgilangan bir barrel uchun 60 dollarlik narx chegarasidan past narxda hamda tashishda sanksiyalar ostidagi kompaniyalar va kemalar ishtirok etmasa, sotib olishni davom ettirishini ta’kidladi.
Joriy yilning 10-yanvar kuni AQSH Rossiyaning neft sektoriga qarshi keng ko‘lamli sanksiyalarni joriy etgandi. Cheklovlar “soya floti”ning 180 dan ortiq tankerlari, “Gazprom neft”, “Surgutneftegaz”, yirik sug‘urta kompaniyalari (“Alfa-sug‘urta” va “Ingossug‘urta”), shuningdek, neft-gaz kompaniyalarining oltita yuqori lavozimdagi menejerlarini qamrab oldi. Rystad Energy baholashicha, buning oqibatida Hindiston kuniga 500 ming barrelgacha xom ashyodan mahrum bo‘lishi mumkin.
Izoh (0)