“Gazprom” Rossiyaning Ukrainaga bosqini ortidan “biznes modeli barbod bo‘lganidan” so‘ng, kompaniyani rekord darajadagi zararlardan “o‘nglab olish” imkonini beruvchi islohotlarni rejalashtirmoqda. Bu haqda Financial Times (FT) xabar berdi.
FT “Gazprom transformatsiyasi” deb nomlangan 42 sahifali taqdimot bilan tanishib chiqdi. Unda kompaniyaning asosiy muammolari — ta’minot zanjirlarining uzilishidan tortib Yevropa bozoriga kirishning cheklanishigacha bo‘lgan masalalar muhokama qilingan. 2024-yili tayyorlangan hisobotda, kelasi yil Yevropa va Turkiyaga gaz yetkazib berish hajmi 2019-yildagi ko‘rsatkichga nisbatan 5 barobardan ko‘proq kamayishi ta’kidlangan.
“Gazprom” kompaniyasini isloh qilish vazifasi bosh direktor o‘rinbosari Yelena Ilyuxinaga yuklatildi. Financial Times ma’lumotiga ko‘ra, u “Gazprom”ning tarqoq bo‘linmalarini yagona vertikal integratsiyalangan kompaniyaga birlashtirishni rejalashtirmoqda. Bu esa “Gazprom”ning eng daromadli bo‘linmasi – “Gazprom Neft” ustidan nazoratni kuchaytirishni anglatadi. Ilyuxina ilgari ushbu bo‘linmaning top-menejeri bo‘lgan.
FT havola qilgan taqdimotda xarajatlarni qisqartirish ham taklif qilingan. Gap xizmat safarlari, ofislarni ijaraga olish va davlat organlari bilan aloqalarni o‘rnatish xarajatlari haqida bormoqda. Yana bir chora-tadbir, masalan, metan yonilg‘i quyish shoxobchalari tarmog‘ining bir qismini sotish bo‘lishi mumkin.
Ilyuxina, shuningdek, bosh ofisda “Gazprom” tarixidagi eng yirik ishchilar sonini qisqartirishni amalga oshirishni taklif qildi. Kompaniya rahbari Aleksey Millerga yo‘llagan maktubida u 1600 nafar xodimni (ya’ni 40 foizdan sal kamrog‘ini) ishdan bo‘shatish zarurligini aytgan. 2025-yil yanvar oyida Ilyuxina kompaniyaning markaziy apparati va Sankt-Peterburg filiali xodimlari sonini bir yarim baravardan ko‘proq — 4100 dan 2500 kishigacha qisqartirishni taklif qilayotgani haqida xabar berilgandi.
Taklifga ko‘ra, kompaniyaning kamida uchta bo‘limi, jumladan, 2022-yilda G‘arb texnologiyalariga Rossiya muqobillarini izlash uchun tashkil etilgan bo‘linmasi yopilishi kerak. Yana sakkizta bo‘linma, jumladan, tashqi iqtisodiy aloqalar va kapital ta’mirlash bo‘limini birlashtirish, yuridik, soliq va g‘aznachilik boshqarmalari funksiyalarini yagona markazga o‘tkazish rejalashtirilmoqda.
Financial Times ma’lumotlariga ko‘ra, Yelena Ilyuxina “Gazprom” tarkibida 15 yildan ortiq vaqt mobaynida ishlagan. U, xususan, Sankt-Peterburgdagi “Laxta markazi” qurilishini nazorat qilgan. FT uni “Millerning safdoshi” deb ataydi va u Putinning sobiq yordamchisi Marina Yentalseva bilan do‘st ekanini ta’kidlaydi.
Ilyuxina energiyaga to‘la va korporativ siyosatni yaxshi tushunadi. U “Taxtlar o‘yini”ning shafqatsiz qahramoni Sersey Lannisterga o‘xshaydi. Ammo hatto u ham bu botqoqlikni qo‘zg‘ata olishiga shubham bor, dedi Ilyuxina bilan ilgari ishlagan suhbatdosh FT bilan suhbatda.
2024-yil sentyabr oyida Forbes Rossiya kompaniyalarining sof foyda hajmi bo‘yicha 100 ta eng yirik reytingini e’lon qildi. Unda ilgari reytingda peshqadam bo‘lgan “Gazprom” yo‘q edi. Kompaniya yangi ro‘yxatdan rekord darajadagi 583 milliard rubl zarar bilan chiqib qoldi. Zarar ko‘rib ishlayotgan kompaniyalar reytingida “Gazprom” birinchi o‘rinni egalladi.
2025-yil yanvarida “Gazprom” strategik bo‘limi rahbari Aleksey Saxarov kompaniya 2050-yilgacha gaz eksporti bo‘yicha mutlaq monopoliya huquqini mustahkamlash zarurligini bildirdi. U yirik investitsiya loyihalarini amalga oshirishi uchun Rossiyada gaz narxini oshirishni taklif etdi.
Izoh (0)