O‘tgan hafta Yevropa va boshqa mamlakatlarda to‘p tepadigan bir qancha legionerlarimiz o‘z klubida navbatdagi o‘yinlarini o‘tkazdi.
Eldor Shomurodov
“Roma”da harakat qiladigan o‘zbekistonlik hujumchi Eldor Shomurodov Italiya chempionatining 27-turi doirasidagi “Komo”ga qarshi bahsda ishtirok etdi. Dastlabki daqiqalardan maydonda harakat qilgan futbolchi ikkinchi taym boshida almashtirildi. 45 daqiqa harakat qilgan Eldorning o’rniga Artyom Dovbik maydonga tushirildi.
Uchrashuv rimliklarning 2:1 hisobidagi g‘alabasi bilan yakunlandi. “Roma” esa mazkur bahsdan keyin ochkolari sonini 43 taga yetkazib, turnir jadvalida 8-o‘rindan joy oldi.
45 daqiqa maydonda harakat qilgan hujumchi FlashScore talqini bo‘yicha, 6,6 ball olgan bo‘lsa, Sofascore tomonidan 6,5 ballga loyiq ko‘rildi.
Otabek Shukurov
Saudiya Arabistonining “Al-Feyha” klubida o‘ynaydigan Otabek Shukurov chempionatning 23-turi doirasida o‘z maydonida “Al-Vehda”ni qabul qildi. Qiziqarli o‘tgan bahsda tomonlar 0:0 hisobida durang o‘ynashdi. Qo‘lga kiritilgan 1 ochkodan so‘ng “Al-Feyha” turnir jadvalida 22 ochko bilan 14-o‘rinda qoladigan bo‘ldi.
90 daqiqa harakat qilgan Shukurov jamoasi safidagi eng faol futbolchilardan biri bo‘ldi. FlashScore talqini bo‘yicha Otabekning ko‘rsatgan o‘yini 7,3 ballga loyiq ko‘rilgan bo‘lsa, Sofascore yarim himoyachini “Al-Feyha” safida harakat qilgan eng yaxshi futbolchilardan biri deb e’tirof etdi — 7,2 ball.
Husniddin Aliqulov
Turkiya chempionatida harakat qiladigan Husniddin Aliqulov ham “Rizespor” bilan navbatdagi tur uchrashuvini o‘tkazdi. Superliganing 26-turi doirasidagi “Alanyaspor”ga qarshi bahsda “Rizespor” 3:1 hisobida g‘alaba qozondi.
O‘yinning dastlabki daqiqalaridan maydonda harakat qilgan Aliqulov 72-daqiqada zaxiraga olindi. Mazkur g‘alabadan keyin rizeliklar hisobidagi ochkolar soni 33 ta bo‘ldi va turnir jadvalining 8-pog‘onasidan joy oldi. Flashscore Husniddin ko‘rsatgan o‘yinni 7,4 ball bilan baholagan bo‘lsa, Sofascore tomonidan 7,1 ballga loyiq ko‘rilgan.
Abbosbek Fayzullayev
Futbol bo‘yicha Rossiya chempionatida ham qishki tanaffus yakunlanib, ikkinchi davra o‘yinlari boshlandi. RPLning 19-turi doirasida esa o‘zbekistonlik futbolchi Abbossbek Fayzullayev to‘p tepadigan “SSKA” safarda “Zenit” klubiga qarshi bahs olib bordi. “Gazprom arenda”da o‘tgan bahsda tomonlar 0:0 hisobida durang o‘ynadi. Qo‘lga kiritilgan 1 ochkodan keyin Moskva klubi 32 ochko bilan turnir jadvalining 6-pog‘onasidan joy oldi.
O‘yinni asosiy tarkibda boshlab, 67 daqiqa harakat qilgan Abbosbek FlashScore tomonidan 6,5 ballga loyiq ko‘rildi. Sofascore esa Fayzullayevning harakatlarini 6,3 ballga loyiq ko‘rdi.
Rustam Ashurmatov
Rossiya chempionatida harakat qiladigan O‘zbekiston terma jamoasining yana bir a’zosi Rustam Ashurmatov ham “Rubin” safida navbatdagi o‘yinini o‘tkazdi. Safarda “Ahmat” jamoasiga qarshi o‘ynagan qozonliklar 1:2 hisobida imkoniyatni boy berdi. Bahsni asosiy tarkibda boshlagan Rustamjon 82-daqiqada zaxiraga olindi.
49-daqiqada hakam tomonidan ogohlantirilgan Ashurmatovning o‘yini Flashscore tomonidan 6,5 ballga baholangan bo‘lsa, Sofascore unga 6,6 ball qo‘ydi.
Izoh (0)