Ukraina prezidenti Vladimir Zelenskiy Slovakiya bosh vaziri Robert Fitsoning Moskvaga tashrifi va Rossiya prezidenti Vladimir Putin bilan muzokaralarini keskin tanqid qildi.
“Shuni ta’kidlash kerakki, Moskvadagi uchrashuvdan keyin Fitso va Putin qo‘shma bayonot va OAV savollariga javob berishmadi. Ular uchrashuvda muhokama qilingan narsalar haqida hech narsa ayta olishmaydi. Jamoatchilikning munosabatidan qo‘rqishadi”, degan Zelenskiy.
Fitsoning 22-dekabr kuni bo‘lib o‘tgan tashrifi e’lon qilinmagan, Putin bilan suhbati tafsilotlari keltirilmagan. Biroq Serbiya prezidenti Aleksandr Vuchich bu tashrif Ukrainaning Rossiya gazini Yevropa Ittifoqiga yetkazib berishdan bosh tortishi bilan bog‘liqligini aytgandi.
Ukraina 2025-yil 1-yanvardan boshlab Rossiya gazi va neftining Yevropaga tranzitini to‘xtatadi. Kiyev Rossiyadan tashqari boshqa davlatlardan gaz tranzitini amalga oshirishga tayyorligini bildirgan. Ukrainaning “Gazprom” bilan tranzit bo‘yicha kelishuvi 2019-yildan beri amal qilmoqda.
“Moskva Fitsoga sezilarli chegirmalar taqdim etmoqda, lekin buning uchun Slovakiya haq to‘lamoqda. Bunday chegirmalar tekin emas — ular uchun Rossiya suverenitet yoki yashirin sxemalar evaziga to‘lov oladi. Bu Slovakiya huquq-tartibot idoralari va maxsus xizmatlarining e’tiborini tortishi kerak.
U (Fitso) aynan yiliga 500 million AQSH dollari qiymatidagi Rossiya gaziga qiziqish bildirmoqda. Boshqa daromadlarni Ukraina hududidan o‘tadigan va yiliga yana 500 million dollar keltiruvchi neft quvuri ta’minlaydi, bu esa janob Fitsoga qo‘l keladi”, deydi Zelenskiy.
“Nima uchun bu rahbar Moskvaga shunchalik qaram? Unga nima evaziga to‘lashadi va u nima bilan haq to‘laydi?” deb ritorik tarzda so‘radi Ukraina prezidenti. U Robert Fitso o‘z harakatlari bilan “Putinga urushni moliyalashtirish va Yevropani zaiflashtirishga pul topishda yordam berishni istayotganini aytdi.
Fitso 20-dekabr kuni Ukraina prezidenti tufayli Slovakiyaga “gaz inqirozi” xavf solayotganini aytgandi. Uning so‘zlariga ko‘ra, Zelenskiy har qanday gaz tranzitini rad etgan, chunki u bu gaz Rossiyadan kelgan bo‘lishi mumkin deb gumon qilmoqda.
Izoh (0)