Vashington 10-yanvar kuni Moskvaga nisbatan yangi cheklovlar joriy etganidan so‘ng, Rossiya neftini olib ketayotgan kamida 65 ta tanker Xitoy, Singapur va Rossiya qirg‘oqlarida to‘xtab qoldi. Bu haqda Reuters kema kuzatuvi ma’lumotlariga tayanib xabar bermoqda.
Beshta tanker Xitoy qirg‘oqlarida, yana yettitasi Singapur yaqinida, qolganlari Boltiq dengizi va Uzoq Sharqda qolib ketgan, deb yozadi agentlik.
Bular qatoriga, jumladan, Eron portlari va Suvaysh kanali yaqinida bog‘lab qo‘yilgan 25 ta neft tankeri ham kiradi.
13-yanvar kuni ikki million barreldan ortiq Rossiya neftini olib ketayotgan uchta tanker Xitoy qirg‘oqlari sharqidagi suvlarida shamol ta’sirida suzayotgani ma’lum bo‘ldi. Bloomberg’ga ko‘ra, bu Shandun provinsiyasi portlarini boshqaruvchi kompaniya sanksiya ostidagi tankerlarni qabul qilishni taqiqlaganidan keyin sodir bo‘lgan.
Agentlik maʼlumotlariga ko‘ra, Rossiya neftining yana bir yirik xaridori hisoblanuvchi Hindiston ham AQSH sanksiyalari ostida qolgan tankerlarni tushirishdan bosh tortadi. 10-yanvarga qadar ijaraga olingan kemalar bundan mustasno bo‘lib, ular 12-martga qadar yuksizlantirilishi kerak. Bundan tashqari, Hindiston banklari neft sanksiya ostidagi yetkazib beruvchilardan kiritilmasligini kafolatlash maqsadida neftning kelib chiqishi to‘g‘risidagi sertifikatlarni talab qiladi.
Joriy yilning 10-yanvar kuni Qo‘shma Shtatlar Rossiyaning ikki yirik neft eksportchilari – “Gazprom neft” va “Surgutneftegaz”ga qarshi bloklovchi sanksiyalar kiritdi. Ularga, boshqa o‘nlab kompaniyalar qatori, endi dollar yoki Amerika moliya tizimidan foydalangan holda moliyaviy operatsiyalarni amalga oshirish taqiqlangan.
Sanksiyalar, shuningdek, Rossiyaning eng yirik yuk tashish kompaniyasi – Sovcomflotga nisbatan kengaytirildi. Cheklovlar turli mamlakatlar bayroqlari ostidagi 183 ta tankerga taalluqli bo‘lib, ular G‘arb sanksiyalarini buzgan holda Rossiya neft va neft mahsulotlarini olib o‘tayotgani aytilmoqda.
Izoh (0)