Amerikalik olimlar xom karamdan farqli o‘laroq, tuzlangan karam ichaklar uchun haqiqatan ham foydali ekanini aniqladilar. Deyvisdagi Kaliforniya universitetining Applied and Environmental Microbiology jurnalida e’lon qilingan yangi tadqiqot natijalariga ko‘ra, fermentlangan karam ichakning himoya to‘sig‘ini mustahkamlaydi va yallig‘lanishni kamaytirishga yordam beradi.
Oziq-ovqat fanlari professori Mariya Marko rahbarligidagi guruh — xom karam, tuzlangan karam va fermentatsiyadan so‘ng qolgan namakobning ta’sirini taqqosladi. Barcha namunalar yallig‘lanish paytida ularning yaxlitligiga qanday ta’sir ko‘rsatishini aniqlash maqsadida ichak hujayralari sinab ko‘rildi.
Natija shuni ko‘rsatdiki, faqat tuzlangan karam himoya ta’siriga ega ekan. Na yangi karam va na namakob bunday xususiyatga ega emas. Bundan tashqari, uyda tayyorlangan va do‘konda sotilayotgan karamlar o‘rtasida hech qanday farq kuzatilmagan — ikkalasi ham ichak hujayralarini mustahkamlagan.
“Karam fermentatsiyasi jarayonida hosil bo‘ladigan ko‘plab moddalar ichak mikroflorasi ishlab chiqaradigan metabolitlarga o‘xshash”, deydi Marko.
Fermentatsiya karamning kimyoviy tarkibini o‘zgartiradi — ovqat hazm qilish uchun foydali hisoblangan sut kislotasi, aminokislotalar va o‘simlik birikmalarining miqdorini oshiradi. Olimlar yuzlab turli xil birikmalarni aniqladilar va hozirda ularning qaysi biri ichak salomatligiga eng katta hissa qo‘shishini o‘rganmoqdalar.
Keyingi bosqich klinik sinovlar bo‘ladi: agar bu ta’sirlar odamlarda o‘z tasdig‘ini topsa, tuzlangan karam oshqozon-ichak traktining yallig‘lanish kasalliklarining oldini olishda kundalik ratsionning muhim qismiga aylanishi mumkin.
Izoh (0)