Bryussel karami haqida eshitganmisiz? Ko‘plab oilalarda mazkur turdagi karam deyarli iste’mol qilinmaydi. Bunga sabab o‘zbek taomlariga ushbu sabzavotning qo‘shilmasligi yoki shunchaki undan biror taom tayyorlashni bilmaslikdir. Qolaversa, ko‘pchilikka bryussel karamining biroz tarix ta’mi yoqmaydi. Biroq diyetologlarning ta’kidlashicha, u dunyodagi eng foydali sabzavotlar ro‘yxatida birinchilikni egallaydi.
Bryussel karami ko‘rinishidan mayda latuk karamiga o‘xshab ketadi, u o‘zida ko‘plab vitamin va minerallarni saqlagani bois o‘ndan ortiq kasallikka da’vo hisoblanadi. Mutaxassislar ushbu karamni kundalik ratsionga kiritishni tavsiya qilishadi.
Tadqiqotlarga ko‘ra, bryussel karami o‘zida foydali moddalarni saqlash bo‘yicha boshqa bir qator sabzavotlardan ustun bo‘lib, undagi C vitamini miqdori limonga qaraganda ko‘proqdir. U barcha organlarning ishlashi, immunitet mustahkamligi, kollagen sintezi va metabolizm uchun zarurdir.
Foto: Agro Thrive
Ushbu turdagi karam suyak, tirnoq va sochni mustahkamlovchi kaltsiyga boy. 100 gramm bryussel karamida kamida 4 gramm o‘simlik tolalari mavjud. Ular ichaklarning normal ishlashi uchun muhimdir. Bryussel karamning oshqozon-ichak trakti kasalliklarida ham iste’mol qilinishi ruxsat etilgan kamdan-kam sabzavotlardan biridir. U qorin dam bo‘lishiga olib kelmaydi, fermentatsiyaga uchramaydi va boshqa noqulay alomatlarga olib kelmaydi.
Shuningdek, ushbu sabzavotda saratonga qarshi birikmalar hamda glyukozinolatlar mavjud bo‘lib, ular organizmdan turli toksinlar va kanserogenlarni chiqarib tashlashga yordam beradi hamda yurak kasalligiga chalinish xavfini kamaytiradi.
Bryussel karami suyuq ovqatga solinganda xushta’m maza beradi. U xom yoki qaynatilgan, qovurilgan holda iste’mol qilinadi. Undan turli konservalar ham tayyorlash mumkin.
Izoh (0)