O‘zbekistonda tijorat banklari tomonidan ayollar tadbirkorligini rivojlantirish uchun qulay moliyaviy paketlar taqdim etiladi.
Misol uchun, “Milliy bank” xizmatlar sohasida kamida 200 ming nafar xotin-qizning loyihalariga ko‘maklashadi. “Turonbank” ATB limonchilikda 150 ming nafar ayollar daromad topishi uchun arzon kreditlar taqdim etadi.
Xuddi shuningdek
- “Mikrokreditbank” ATB parrandachilikda — 160 ming nafar,
- “Sanoat qurilish bank” ATB sabzavot va ko‘chatlar yetishtirishda — 160 ming,
- “Xalq banki” uzum, brokkoli va mahalliy karam yetishtirishda — 150 ming,
- “Agrobank” bog‘dorchilik yo‘nalishida — 144 ming,
- “Biznesni rivojlantirish banki” ko‘kat, bulg‘or qalampiri, baqlajon va pomidor yetishtirishda — 94 ming,
- “Asakabank” farmatsevtika va uzumchilikda — 82 ming,
- “Aloqabank” IT, asalarichilik va mevali ekinlar yetishtirishda 58 ming nafar ayollarni band etishga ko‘maklashadi.
Prezident Ko‘ksaroy qarorgohida Xalqaro xotin-qizlar kuni munosabati bilan o‘tkazilgan tadbirda 2025-yilda 2 million nafar ayollar bandligini ta’minlash, shundan 1 million 300 ming nafar xotin-qizni tadbirkorlikka jalb etish bo‘yicha katta marralar olinganini aytgandi. Yuqoridagi moliyaviy paketlar ularga shu maqsadda taqdim etiladi. Ayollar tadbirkorligini rivojlantirish bo‘yicha 4 bosqichli yangi tizim yo‘lga qo‘yiladi.
Bu yil mahallalarda ayollar tadbirkorligi loyihalari uchun qo‘shimcha 3,3 trillion so‘m ajratiladi. Bunga qo‘shimcha ravishda tijorat banklari ham 100 million dollar jalb qilib, mahallalarda o‘zini o‘zi band qilgan xotin-qizlarga 50 million so‘mgacha garovsiz kreditlar ajratadi.
Izoh (0)