Америкалик олимлар хом карамдан фарқли ўлароқ, тузланган карам ичаклар учун ҳақиқатан ҳам фойдали эканини аниқладилар. Дейвисдаги Калифорния университетининг Applied and Environmental Microbiology журналида эълон қилинган янги тадқиқот натижаларига кўра, ферментланган карам ичакнинг ҳимоя тўсиғини мустаҳкамлайди ва яллиғланишни камайтиришга ёрдам беради.
Озиқ-овқат фанлари профессори Мария Марко раҳбарлигидаги гуруҳ — хом карам, тузланган карам ва ферментациядан сўнг қолган намакобнинг таъсирини таққослади. Барча намуналар яллиғланиш пайтида уларнинг яхлитлигига қандай таъсир кўрсатишини аниқлаш мақсадида ичак ҳужайралари синаб кўрилди.
Натижа шуни кўрсатдики, фақат тузланган карам ҳимоя таъсирига эга экан. На янги карам ва на намакоб бундай хусусиятга эга эмас. Бундан ташқари, уйда тайёрланган ва дўконда сотилаётган карамлар ўртасида ҳеч қандай фарқ кузатилмаган — иккаласи ҳам ичак ҳужайраларини мустаҳкамлаган.
“Карам ферментацияси жараёнида ҳосил бўладиган кўплаб моддалар ичак микрофлораси ишлаб чиқарадиган метаболитларга ўхшаш”, дейди Марко.
Ферментация карамнинг кимёвий таркибини ўзгартиради — овқат ҳазм қилиш учун фойдали ҳисобланган сут кислотаси, аминокислоталар ва ўсимлик бирикмаларининг миқдорини оширади. Олимлар юзлаб турли хил бирикмаларни аниқладилар ва ҳозирда уларнинг қайси бири ичак саломатлигига энг катта ҳисса қўшишини ўрганмоқдалар.
Кейинги босқич клиник синовлар бўлади: агар бу таъсирлар одамларда ўз тасдиғини топса, тузланган карам ошқозон-ичак трактининг яллиғланиш касалликларининг олдини олишда кундалик рационнинг муҳим қисмига айланиши мумкин.
Изоҳ (0)